Ayera minister di Naturalesa, Ursell Arends hunto cu Fundacion Parke Nacional Aruba a reuni cu e bestuur di e Tourism Product Enhancement Fund, conhuntamente cu minister di Turismo, Sr. Dangui Oduber, pa asina cuminsa fiha e posibilidad cu TPEF por contribui na e proyecto di “Western Wetlands”.

No solamente pa proteccion di naturalesa, pero pa añadi esaki na Aruba su producto turistico tambe.

E intencion ta pa conecta e 5 saliñanan di pabao:

• Saliña Bubali

• Saliña Palm Beach

• Saliña Cerca

• Saliña Malmok

• Saliña Druif (Tierra del Sol).

For di basta tempo a bin ta comunica cu nos isla tin reto grandi pa resolve, entre otro e renobacion sumamente necesario di nos planta RWZI na Bubali.

Minister Arends ta spera cu pronto por mira e proyecto aki bira realidad. E no solamente lo brinda un solucion pa e maneho di desperdicio di awa di riool, pero tambe lo crea un eco-sistema vibrante caminda ambos naturalesa y ciudadanonan por gosa di dje.