Durante henter luna di october, Aruba ta celebra nos adultonan mayor. E iniciativa aki ta un refleho di e legado cu nos grandinan a construi y ta sigui construi pa nos, na beneficio di Aruba su futuro generacionnan.
Hopi biaha ora nos ta papia di personanan 60+, e palabra “biehes” ta resalta, no tur ora den un manera positivo, pero manera nan ta bisa “bieu ta caminda!” Biehes ta un etapa di bida unda cu bo ta cosecha e fruto di cual bo a planta na jong. E amor, e cariño y e guia cu bo a duna bo sernan keri.
Dos aña pasa Gobierno di Aruba a establece ful un luna di adulto mayor, esaki despues unda pa prome biaha Aruba a conoce un ministerio di adulto mayor. E compromiso aki ta subraya e importancia di reconoce y sostene e necesidadnan unico di nos adultonan mayor.
Sinembargo, den e celebracion, Ministerio di Adulto Mayor ta reconoce e desafionan cu algun di nos adulto mayor ta enfrenta. Tin momentonan unda nan ta biba den circunstancianan lamentabel, faltando bishita, yamada, y recuerdo. Pa enfrenta esaki, den colaboracion cu Club Kibrahacha, a lansa Telefon pa Adulto Mayor, yamando #125 no solamente ta brinda sosten, sino tambe un horea pa tende y asina nos adultonan mayor por sinti inclui den nos comunidad.
Nos grandinan nan inclusion den nos comunidad ta esencial pa e formacion di un sociedad cu ta duna adulto mayor e respet, cuido y apoyo cu nan mester den nan biehes. “Ta nos deber como comunidad pa garantisa nan siguridad, bienestar y brinda nan e dignidad cu nan merece”, Minister Arends ta remarca.
Minister Arends tin un bista integral pa e cuido di adulto mayor, unda ta move for di un perspectiva puramente medico pa un cu ta enfatisa sosten social. Colaboracion den e tereno di cuido pa adulto mayor ta bira instrumental pa garantisa bienestar y calidad di bida pa e grupo creciente di adulto mayor. Esaki ta implica un esfuerso colectivo di profesionalnan di cuido medico, casnan di cuido, y e comunidad amplio, reconociendo cu e cuido di adulto mayor no ta solamente un asunto medico, sino un enfoke integral, social, y emocional.
Den nomber di Gobierno di Aruba, Minister Arends ta expresa gratitud na tur esnan cu ta traha incansablemente pa sostene nos adultonan mayor directamente y ta sigui encurasha actividadnan continuo dedica na nan durante henter e aña y no solamente durante luna di october.
