A tene un reunion constructivo cu e Comision Pro Cunukeronan Arubiano, bao di liderazgo di señor Jair Britten. Durante e encuentro, a trata e desafionan principal cu agricultornan y criadonan tradicional ta enfrenta diariamente den nan esfuerso pa alimenta Aruba.
E comision ta representa un grupo amplio di productornan local cu ta traha cu pasion y dedicacion pa mantene nos tradicion agricola bibo. Den e reunion, e miembronan di e comision a comparti abiertamente e obstaculonan cu actualmente ta limita e crecemento di e sector, entre otro:
Necesidad pa mihor proteccion pa e producto local contra importacion barata di afo;
Acceso na awa na prijs accesibel pa agricultura y criamento di bestia;
Gasto halto di cuminda pa bestia;
Necesidad pa mehora colaboracion cu Santa Rosa (DLVV);
Brotanan di enfermedad di bestia, falta di sosten veterinario y prijs halto di medicamento;
Falta di genetica nobo pa mehora rasanan di bestia local;
Necesidad pa un luga central y permanente pa agricultornan y criadonan di bestia por bende nan producto directamente na comunidad;
Y no menos importante, e problema serio di cachonan di caya cu ta causa daño na criamento di bestia.
Minister Wever a scucha cu atencion e preocupacionnan y ideanan di e comision y a accentua e papel esencial cu e grupo aki tin den e transicion mas amplio di Aruba pa un sector primario sostenibel y resiliente. “Awe nos no a papia solamente, pero nos a realmente scucha. Nos agricultornan a indica claramente unda e problema ta. Awor ta na nos pa, hunto cu nan, implementa solucionnan concreto. No mas estudio — pero accion concreto y efectivo,” segun Minister Wever a expresa.
Basa riba e puntonan trata, e ministerio lo traha den cooperacion estrecho cu Comision Pro Cunukeronan Arubiano y cu partnernan relevante pa implementa accion concreto cu ta dirigi no na estudio of analisis, sino na medidanan practico y efectivo pa yuda e sector crece, modernisa y prepara pa futuro.
E reunion aki ta marca un punto di partida importante pa un colaboracion mas cerca entre gobierno y agricultornan, cu un meta comun pa fortalece produccion local, amplia seguridad alimenticio y preserva nos herencia agricola Arubano.
“E cunukero ta central den nos esfuerso pa sostene un Aruba fuerte y independiente. Gobierno ta compromete pa traha hunto cu nan pa sigura cu nos agricultura tradicional por sigui florece, den un manera sostenibel y moderno.” Minister Wever a conclui.
E reunion cu Comision Pro Cunukeronan Arubiano ta forma parti integral di e Programa di Gobernacion AVP–FUTURO 2025–2028, cu ta enfoca riba reforsa e sector primario, seguridad alimenticio, y desaroyo economico di Aruba.
Bou di liderazgo di Minister Wever, e ministerio ta sigui traha pa crea un ecosistema agricola moderno y productivo, caminda colaboracion, innovacion y sostenibilidad ta bay man den man pa sigura bienestar pa Aruba y su ciudadanonan.
