E sistema nacional di estadistica, NSS lo percura pa informacion confiabel, na tempo y relevante cu ta bay yuda formula maneho sostenibel. Asina mr. Geoffrey Wever, Minister di Asunto Economico, Comunicacion y Desaroyo Sostenibel a splica. E proyecto ta canando bon y tin 2.5 miyon riba presupuesto 2023 pa implementacion, y por conta cu un inyeccion financiero di Hulanda di 600 mil euro pa su realisacion.
“E NSS ta un proyecto cu a inicia a base di diferente recomendacion cu entidadnan local y internacional a duna Aruba,” Minister Wever a splica. “Un NSS ta yuda un pais hiba un maneho mas profesional y transparente, basa riba data. Ora di tuma decision e ta importante cu tin tur informacion disponible, y den un sistema di NSS ta combina tur data produci den e pais den un forma integral, eficiente y efectivo.”
Pa tal motibo a lanta un comision NSS bao guia di Sra. Desiree Helder di Central Bureau di Estadistica, kende a guia e trabao pa prepara plan di implementacion. “E plan ta cla y mirando cu e NSS ta un proyecto complica y cu ta costa placa, a dicidi pa pidi asistencia internacional, particularmente di e United Nations Statistical Division y ECLAC pa duna revision y aporte tecnico riba e plan di implementacion. E revisionnan aki tabata hopi positivo.”
Conseho di Minister a aproba e plan na Juni ultimo y awor a inicia e fase di implementacion, y ta importante pa splica comunidad pakico e NSS ta asina importante y ki impacto e lo tin na momento cu e ta funciona optimalmente. Ta trata di un instrumento cu hopi pais desaroya tin. “E ta un instrumento pa maneha bo pais profesionalmente, unda ta basa decision riba tur e data disponible. Na Aruba tin diferente instancia cu data, pero nan no ta centralisa. Un NSS ta unda informacion ta keda centralisa, cu ta yuda maneho pa determina cua inversion ta necesario y cuanto fondo e lo rekeri. E ta un instrumento pa bon gobernacion,” Minister Wever a bisa.
E comision, ademas di CBS, ta consisti di representante di instancianan cu ta produci y compila dato nan mes, manera Banco Central di Aruba, Direccion pa Asuntonan Economico, Departamento di Labor, Direccion di Enseñansa, Direccion Naturalesa y Medio Ambiente y Censo. E Minister ta enfatisa cu e ta positivo cu a pesar di situacion dificil, Aruba a haci escogencia pa bin cu instrumento pa mehora forma con ta goberna e pais, ya cu e NSS ta un instrumento pa Gobierno tuma miho decision. Parlamento, cu tin e tarea principal ta pa controla Gobierno por tin e informacion necesario pa haci su trabao miho.
Implementacion di NSS ta encera un plataforma digital, percura pa leynan nobo (e trayecto a inicia caba) y percura cu tin training regular pa profesionalnan cu mester tene e informacion relevante. E NSS ta parti di e plan di Gobernacion y maneho di Minister, ademas cu e ta delinea den e landspakket y identifica den e plan nacional strategico. E Minister a enfatisa cu no solamente Gobierno lo beneficia di e NSS, sino comerciante y tur ciudadano, ya cu e data lo ta accesibel y comprendibel pa tur hende.
Transparencia y igualdad
Desiree Helder di CBS a splica cu meta principal ta produccion di estadistica oficial. Diferente departamento, incluso CBS ta produci data pero no den forma integra cu otro. “E sistema aki ta nifica cu ta traha hunto pa produci datonan hunto, cu ta nifica miho calidad di informacion y relevante pa tur usuario, for di Gobierno te studiante. Un aspecto importante di e NSS ta cu e data por keda produci na tempo.”
Helder a splica cu awor aki pa motibo di falta di miho coordinacion y comunicacion, no ta produci estadistica na tempo y esnan cu ta bin cu maneho no por usa data awor, ya cu mester di esun mas nobo. Como tal mester di data a base regular. “Estadistica ta importante, pasobra nan ta bisa algo di nos. Nan ta bisa ken nos tabata y ken nos lo bira. Naturalmente, no ta e presente ta importante sino kico a sosode den pasado. Mester sa con populacion, economia ta cambiando pa asina determina ki decision por tuma pa futuro. Como tal estadistica ta necesario pa realmente bin cu decision sostenibel. Sea ta gobierno, comerciante of ciudadano comun, e ta miho sirbi si e por mira proyeccionnan realistico pa dicidi si ta inverti den algo awor, of ta warda miho momento. Por ehempel, e lo ta bon pa cumpra cas awor of warda?”
Helder a amplia: “Si e esnan cu ta maneha pais cu tin informacion di calidad halto, relevante y na tempo, nan por tuma miho decision pa un miho desaroyo di Aruba. E ta crea mas confianza den Gobierno.”
NSS mester ta transparente unda e metodologia di acumula data, frecuencia di e proceso y ken ta responsabel pa e informacion ta conoci. Mescos ta conta pa acceso igual. “Meta di e sistema ta pa produci estadistica cu ta comprendibel pa tur hende y asina ta promove igualdad. E mester ta comprendibel pa esun cu ta encarga cu maneho pero tambe un empresario cu kier habri un negoshi, of un alumno cu mester haci un presentacion.”
E ta yuda na decisionnan mas responsabel, na tur nivel, Helder a enfatisa. “E data ademas ta imparcial, sin interes particular nan tras. E data oficial di NSS no lo tin ningun interes particular, sea ta politico of comercial.” Ta bay logra esaki door di usa standard internacional, manera cu Nacionnan Uni ta usa. “Nos como CBS ta usa e standardnan aki y lo usa nan pa e NSS, pasobra asina tambe ta permiti pa por compara Aruba cu otro pais.”Ademas, data confiabel ta permiti Aruba ricibi sosten di instancianan internacional.
Minister Wever tabata den Parlamento e siman aki pa splica e NSS y a bisa cu e ta contento cu e reaccion. Aunke no tur Parlamentario tabata mes positivo, e ta convenci cu Parlamento den su totalidad ta sostene e proyecto cu ta bay ta un instrumento importante pa por haci e trabao pa controla Gobierno mas eficiente y efectivo.
