Recientemente Minister di Salud Publico, Asunto Social, Cuido di Adulto Mayor y Cuido di Adicto drs. Mervin Wyatt-Ras (AVP) a haci diferente bishita na departamento- y instancianan cu ta resorta bao di su maneho. Un di nan ta e casnan di cuido cu ta cay bao di Stichting Algemene Bejaardenzorg Aruba (SABA), manera Centro di Cuido Oranjestad, Huize Maris Stella y Cas di Cuido San Nicolas.
A ricibi informacion amplio di tur locual ta come y bebe, como tambe di e maneho diario den dicho departamento. Minister Wyatt-Ras a haya un bista completo di e gastonan di e presupuesto cu nan cu traha cune y mas cu tur cos, di e trato cu e grandinan ta ricibi den cada un di e casnan di cuido.
“Minister Wyatt-Ras ta admira e determinacion y sentido di responsabilidad cu e trahadonan tin pa nan trabao, specialmente si mira e recursonan hopi limita cu nan tin na nan disposicion. E aprecio pa nos grandinan ta obvio, mirando cu ta nan a traha duro den nan tempo pa nos por disfruta di e Aruba dushi di awe,” segun un comunicado di gobierno.
Segun e comunicado, locual a capta Minister Wyatt-Ras su atencion ta e cantidad grandi di adulto mayor cu ta sufri di problema fisico pero tambe neurologico manera entre otro Alzheimer. Esaki ta den un porcentahe basta halto di alrededor di 75% cu lo mester di un cuido mas specialisa y/of di enfermeria cual ta haci e reto mas grandi ora ta mira e casnan di cuido aki.
Minister Mervin Wyatt-Ras a enfatisa cu cuido di nos grandinan ta un parti esencial den e cadena di cuido medico aki na Aruba, y segun e comunicado, tin e compromiso pa eleva tur aspecto di cuido na un nivel sostenibel y digno pa tur hende.
