Dialuna atardi, Minister President, Sra. Evelyn Wever-Croes hunto cu Minister di Finanzas y Cultura, Sra. Xiomara Maduro a tene un rueda di prensa pa toca ariba algun punto cu sindicatonan a presenta den nan carta, despues di e declaracionnan di Secretario di Estado, Sr. Raymond Knops despues di e Conseho d Minister di Reino di dia 17 di december 2021. Apart di e tres puntonan principal cu e sindicatonan a presenta, Minister Maduro a elabora ariba algun otro expresionnan den e carta largo di e sindicatonan tambe.

Den a carta di sindicatonan tin algun expresion cu Minister Maduro a elabora ariba y a duna splicacion den nomber di Gobierno di Aruba. Sindicato a expresa den nan carta cu ta bon cla cu Gobierno di Aruba kier tuma pueblo haci y ora cu sindicatonan ta bisa cu nan no ta kere den e gobierno, ta pa e motibonan aki. Maduro a splica cu Gobierno di Aruba ta goberna na bienestar di henter Aruba y a caba di mustra cu e ponencia y e conclusion cu sindicatonan a tuma no ta den e contexto di e realidad.

Sindicato a indica tambe cu tin un falta di transparencia grandi di parti di Gobierno di Aruba y un “hungamento cu emocion di hende”. Di otro banda Maduro a enfatisa cu nunca antes den un gobernacion di pais Aruba tabatin asina hopi informacion disponibel, specialmente ora ta trata di informacion financiero.

Den nan carta e sindicatonan ta señala cu gobierno ta impone y menasa trahadonan y esey no ta yuda tampoco. Di parti di gobierno, Maduro a indica: “Di nos banda nos por indica na ningun momento Gobierno di Aruba a impone y/of menasa trahadonan. El a sigui splica cu mester a tuma decisionnan pa salba Aruba y cu talbes algun di nan no ta popular pero ta necesario pa e bienestar di full Aruba. “

Pa locual ta trata e asunto di manifestacion “no work no pay” Maduro a menciona cu esaki ta algo usual y no ta algo cu awo a wordo inventa. El a enfatisa cu gobierno a laga tur hende manifesta sin cu a bay corte of cu a usa forsa di ‘sterke arm’ pa intimida manifestadornan.

“Nos tambe tabata den oposicion, nos tambe tabata riba caya, nos tambe a manifesta, pero nos tambe a wak con cos por bay diferente. E biaha aki tur cos a bay pasivamente, laga tur hende manifesta. Minister President a baha na varios ocasion y a tuma manifiesto, kiermen tur hende tabatin oportunidad pa eherce e libertad cu tin pa cu manifesta, no a stroba esey”, Maduro a bisa.

Ariba e tema di “no work no pay”, Minister President a splica cu siman pasa dialuna durante e manifestacion di e sindicatonan – cu segun Minister President no a wordo anuncia – nan a para dilanti Parlamento di Aruba, unda cu tabatin hopi tension y presidente di parlamento a pidi Minister President pa por fabor atende e sindicatonan, cual Minister President a haci.

El a sinta na mesa cu sindicatonan y el a splica cu e sindicatonan a pidi pa no kita e oranan cu nan manifesta for di nan salario. Segun Minister President ta sigui splica na momento ey el a tuma e peticion for di e sindicatonan y a pidi nan pa por fabor pone riba papel, cual, segun Minister President, e sindicatonan a nenga di haci.

Basa ariba e consehonan cu Minister President a ricibi te cu aworaki pa loke ta trata ‘no work no pay’, cu tabata bisa pa tene cuenta cu loke e dicidi pa loke ta e topico aki pasobra tin sindicatonan cu a kita placa di e oranan di manifestacion for di nan empleadonan caba. “Algun si algun no, no ta husto. Mi lo bay studia tur e consehonan, si tur a drenta caba, y e ora tuma un decision ariba esey”, Minister President a bisa.

Sindicatonan ta menciona den nan carta tambe cu diripiente Hulanda kier pa Gobierno di Aruba ‘bypass’ Parlamento di Aruba, pa bin como exigencia, awor cu Gobierno di Aruba no kier pone un paro na accionnan contrario na loke nan ta acorda tras di cortina cu Hulanda. Esaki, nan ta sigui bisa, ta pa mañan nan culpa e contra reaccion di Hulanda. CAft ta pidi Gobierno di Aruba pa kita e ocho miyon cu tin poni riba presupuesto pa tuma mas hende den servicio. “Akinan ta sconde cu ta pa yena vacatura pa funcionnan esencial. Esaki ta yama trocemento di berdad y ta leu di e berdad”, sindicatonan ta indica den e carta.

Maduro a indica cu Gobierno a brinda un splicacion amplio di e condicionnan cu a bin na ultimo momento pa por ricibi e di ocho tranche di sosten di likides. El a sigui bisa cu gobierno a duna transparencia na tur acuerdo y tur agenda cu Gobierno di Aruba a firma te na e momentonan aki cu Hulanda y a splica tambe e ocho miyon na vacatura nobo den aña 2021 ampliamente. “Nos niun tin beneficio ni tin motibo pa sconde of troce e berdad. Ta un berdad tin”, Maduro a agrega.

Segun e sindicatonan indica tambe, nan semper ta habri pa dialogo semper y cuando e informacion ta corecto y cifranan ta certifica. Segun nan, parlamento mes ta reclamando cu no ta ricibiendo informacion corecto, kico e sindicatonan mes tin cu spera e ora.

Gobierno di Aruba a ofrece e sindicatonan pa forma un comision financiero caba, y segun Minister a indica ta pa e mesun motibo aki Gobierno di Aruba a a haci e peticion aki. El a splica cu den e comision financiero, cu representacion di gobierno y representacion di e sindicatonan, nan por haya sa tur detayes di e situacion financiero di pais Aruba, pero mayoria di sindicatonan no a acepta e invitacion aki mientras cu no elimina e 12.6%.

“Den e comision aki sigur por verifica con e cifranan ta wordo compila, analisa y presenta y akinan por haya tambe splicacion detaya cu ta necesario pa por kita cualkier duda cu por ta existi. E mesun cifranan aki ta cifranan cu ta wordo usa oa Banco Central, CAFT, IMF, FITCH, Standard and Poors, World Bank entre otro. P’esey no tin ningun motibo pa duda den e trabao di e profesionalnan di Departamento di Finanzas”, Maduro a declara.

Por ultimo el sindicatonan y organisacionnan ta insisti den nan carta riba e hecho cu ta fuera di tur etica, contra di tur moral pa pais Aruba, cu tin un democracia, den su rol como dunador di trabao mishi den e cartera di su empleadonan, trahador di companianan estatal y trahadornan di fundacionnan, y tambe keda mishi cu e gelijkbedrag di e pensionadonan. Sindicatonan no ta acepta e ponencianan ni e mita berdad di parti di Gobierno di Aruba y ta sigui riba e exigencia pa stop e kitamento di 12.6%. “Ta parce cu Gobierno di Aruba no por ni soluciona problema di su empleadonan corda pa bini cu progreso y bienestar pa pais Aruba”, asina sindicatonan a expresa den e carta

Maduro a splica cu e condicionnan pa Aruba haya sosten di likides den forma di prestamo ta hopi duro y el a menciona cu nan a indica esey desde e prome dia aña pasa y pa e motibo ey tambe Gobierno “tin tur comprension pa e dolor y frustracion cu esaki ta causa, no kere pa un momento cu nos ta den un situacion ideal. Lo tabata hopi inmoral pa laga nos economia cay den otro y mas aun pa laga hende perde nan bida”.

Pa locual ta e gelijkbedrag di e pensionadonan, segun Minister Maduro a recorda cu e mayoria grandi di sindicatonan a bay na fabor pa kita esaki na 2014, inlcuso e sindicato di pensionadonan.