Gobierno Hulandes ta enfatisa cu fortificacion di su defensanan na Europa lo beneficia tambe e proteccion y preparacion di e parti Caribense di Reino, incluyendo Aruba, Corsou, y Boneiro.
Asina Minister di Defensa Hulandes, Ruben Brekelmans y Secretario di Estado pa Defensa Hulandes, Gijn Tuinman a informa den nan contesta riba preguntanan parlamentario tocante politica di defensa Europeo, den cual ministerionan ta atende inversionnan, consumo di energia, y e despliegue di tecnologianan innovativo den e Ministerio di Defensa.
Segun gobierno Hulandes, Ministerio di Defensa ta ser expandi mas ainda debi na e situacion di seguridad mundial cu ta empeorando. Algun di e inversionnan aki lo beneficia directamente Ministerio di Defensa su actividadnan den Caribe, e mandatarionan a splica. Esaki ta encera presencia di personal militar, disponibilidad di ekipo, y sosten logistico di Hulanda. Aunke detayenan concreto tocante stockpile of expancionnan nobo no a sali ainda, Den Haag ta confirma cu Reino den su totalidad lo ser inclui den e plannan di modernisacion.
Hulanda ta considera un defensa Europeo fuerte esencial pa seguridad di tur parti di Reino. E mandatarionan a indica cu dentro di OTAN y UE, tin cooperacion riba “supresion creibel y defensa colectivo.” Esaki ta nifica cu paisnan Europeo ta inverti conhuntamente den activonan militar moderno, incluyendo drone, capacidadnan cibernetico, y e industria di defensa.
Gobierno ta enfatisa cu e refuerso aki no ta destina como un competencia di armamento, pero como un respuesta necesario na e menasa di Rusia. “Un defensa robusto na Europa en realidad ta contribui na preveni escalacion”, e mandatarionan a splica den nan carta.
Otro punto di atencion ta e rol creciente di tecnologia den e Ministerio di Defensa. Inteligencia Artificial (IA) y tecnologia cuantico ta birando mas y mas importante pa training, procesamento di informacion y seguridad cibernetico. Esaki ta conduci na necesidacnan di energia aumenta, incluso pa centronan di dato cu ta procesa informacion militar.
Ministerio di Defensa a indica cu na Hulanda, solamente coriente genera di forma sostenibel ta ser usa y cu no tin dependencia riba materia prima di Rusia. Den e parti Caribense di Reino tambe e Ministerio ta explora maneranan pa haci uso di energia mas sostenibel na instalacionnan militar, por ehempel, na basenan naval y den proyectonan colaborativo local.
Ademas di inversionnan militar, e Ministerio di Defensa tambe tin como meta pa aumenta resiliencia civil. Ciudadanonan di Reino por participa den e Formacion Nacional di Resiliencia (NWT), un programa di dies siman den cual participantenan ta siña habilidadnan basico cu ta contribui na preparacion di sociedad. E training ta habri pa studiante, empleado y personanan cu kier contribui na seguridad nacional.
Mientras cu e enfoke actual ta riba e contexto di seguridad Europeo, e parti Caribense di Reino ta keda un parti integral di e strategia di defensa Hulandes. Gobierno a confirma cu e presencia di Ministerio di Defensa den e region lo keda mantene y cu inversionnan den futuro tambe lo tin un impacto eynan.
Pa Aruba, esaki ta nifica fortifica e cooperacion existente den e areanan di vigilancia maritimo, control di frontera, y sosten humanitario durante horcan y situacionnan di emergencia.
