Durante un conferencia di prensa diamars merdia hunto cu Prome Minister mr. Mike Eman y Minister di Finansa mr. Geoffrey Wever, Minister di Vivienda y Infrastructura Rene Herdé tambe a uni na e vision di Minister Wever pa cu revitalisacion di e area di Wilhelminastraat.
Mirando e embergadura y importancia di e proyecto aki, Minister Herdé a sigura tur cooperacion di e departamentonan cu ta resorta bao di su ministerio pa e revitalisacion aki cana bon, segun un comunicado di gobierno.
E exito di un vision ta depende di continuacion aunke esaki ta transcende diferente gobierno y esaki ta hustamente unda por elogia Minister Wever cu si e continua cu e vision pa trece bida back den Caya Grandi. E intencion ta pa usa, no solamente inversion fisico pero haci uso di tur instrumento legal pa percura pa e proyecto continua den e fase aki como den mas fase venidero.
Ademas di inversion fisico kier stimula centro di ciudad y cualkier inversion pa cu centro di ciudad. Como Ministerio di Infrastructura tin e posibilidad di facilita entre otro permisonan/precario cu na momento cu e infrastructura t’ey, e comerciante por haci uso di espacio pafo di su negoshi, crea specialmente pa brinda e servicio manera entre otro na restaurant cu ta desea un terasa/patio den aire liber. Tur esaki como parti di e stimulacion na comercio, segun e comunicado.
Pa mantene un centro di ciudad activo, mas di locual e ta na e momento aki, lo mester tene na cuenta cu mantencion di edificio, areanan publico, limpiesa di centro di ciudad cual ta locual e gabinete tin como plan/proyecto pa Oranjestad.
