Ministerio di Innovacion, bao liderazgo di minister Gerlien Croes, ta anuncia cu e prome paso concreto pa implementacion di e sistema Unified eXchange Platform (UXP) lo cuminsa oficialmente.
E sistema UXP lo ser hospeda den e Data Center di SETAR y ta facilita intercambio sigur y standarisa di dato entre sistema di informacion den sector publico. E plataforma ta garantisa cu cada institucion ta keda doño di su propio data, cu acceso controla y comparticion eficiente entre departamentonan, sin duplicacion innecesario di base di dato ni riesgo pa privacidad.
Durante e prome fase di implementacion cu lo tuma luga den e lunanan binidero, servicionan den e siguiente tres departamentonan lo wordo interconecta:
CENSO;
DIMAS;
DIMP.
E interconexion inicial lo contribui na reduccion di proceso manual, eliminacion di ripiticion innecesario di informacion y mehoracion di e calidad y velocidad di servicio publico pa ciudadano y compania.
E introduccion di UXP ta representa un pilar importante den e desaroyo di e-Government di Aruba. Por medio di facilita intercambio confiabel di dato entre departamentonan, e sistema ta crea e base pa servicio digital mas integra, eficiente y orienta riba e ciudadano.
Cu e paso aki, Ministerio di Innovacion ta confirma su compromiso pa construccion di un sector publico mas moderno, sigur y conecta, prepara pa e demanda digital di futuro.
