PIC2.JPG

 

Den menos di un aña gobierno ta spera cu por tin e forsa pa investiga dokternan cu ta duna cierto servicio medico sin cu nan tin e licencia pa haci e trabou aki.

 

Ta conoci cu tin specialistanan cu ta ofrece servicionan medico cual no ta cay bou nan funccion. Hopi biaha por mira cu e cuido ‘ilegal’ aki ta trata di trabou estetico.

 

Bon Dia Aruba a puntra Minister di Salud Publico, Alex Schwengle, kico e sa di cierto dokternan cu ta wordo acusa di haci trabao cu no ta cay bao di nan funcion. Minister Schwengle ta bisa cu e inspeccion lo yuda trece un tiki mas control entre otro riba e practica ilegal, pero cu pueblo mes mester tene mas cuenta cu esaki riba nan mes tambe.

 

”Nos tin falta di hende den e departamento di inspeccion aworaki. Desde januari 2017 ta bay tin cambionan grandi y nos ta pensa cu den menos di un aña nos lo tin suficiente hende pa tin mas forsa pa investiga e asunto aki.”

 

Ministerio di Salud Publico ta depende hopi awor riba e kehonan cu ta drenta. Minister Schwengle ta bisa Bon Dia Aruba cu tin un caso pisa ta andando di dokternan cu ta ‘desfunciona’ como tambe casonan di dokternan cu ta trahando ilegal, centronan di beyesa y otro negoshinan cu ta eherce den practicanan ‘hopi peligroso’.

 

‘Hende mes ta tuma riesgo’

”Mi ta kere cu tin mas casonan pero pueblo tambe mester bira mas consciente pa nos no mester haci uzo di e cosnan aki.” E mandatario ta bisa cu nos mesun pueblo ta bay cerca hende ‘curandero’ pa haci abortus cu materialnan cu no ta apto. Tambe lo acudi cerca ‘schoonheidsspecialist’ cu ta haci trabaonan ‘hopi peligroso’.

 

”Ta nos mes ta tuma e peliger. Mi por bin cu mil trahado na Inspectie pero tanten cu pueblo mes sigui haci uzo di tur e cosnan ilegalnan aki, e no ta bay stop. Pueblo mes mester bay admiti y yuda nan mes. P’esey nos ta bay sigui brinda mas educacion tambe.”

 

Servicio medico ilegal

E servicionan aki ta entre otro curanderonan cu ta haci abortus cu un hanger y salonnan di beyesa cu ta haci tratamento di serum.  Esaki ta un tratamento di cual ta wordo bisa cu e ta haci e ”rimpels” of lachinan disparce y cu por resulta den enfermedad manera hepatitis. Esaki ta algo cu departamento di inspeccion  tin intencion pa pone man duro riba dje. Ta papiando aki di tuma sanger den un beker di glas te ora cu e forma clompi pa despues nan tuma e awa geel cu ta keda y uza esaki den e tratamento.