E structura di Reino y e trabaonan ta ilustra den documento

Conoce e tarea y e actornan. Esaki ta mustra di ta e meta di e documento cu Ministerio pa Asuntonan Interior di Hulanda y Relacionnan di Reino a produci, pa ilustra tur e locual ta cay bao su responsabilidad.

Gran parti di e ‘BZK Introductie Dossier: Welkom bij BZK’ ta dirigi riba e trabaonan cu e Ministerio tin na Hulanda, pero asina mes a dedica diferente capitulo pa Relacionnan di Reino, unda a splica particularmente na esnan cu ta traha cu e Ministerio, kico ta structura, maneho y proyectonan.

Aruba, mescos cu e otro paisnan autonomo den Reino den Caribe y tambe islanan BES ta cay bao di e Directorado General di Relacionnan di Reino, DGKR cu ta e instancia encarga cu e cooperacion cu e parti Caribense di Reino y ta cay bao maneho di Director General Henk Brons.

DGKR ta parti den dos seccion, uno cu ta dirigi riba e paisnan Corsou, St. Maarten y Aruba y e otro pa islanan BES, cu ta Caribe Hulandes.

DGKR ta conseha e Minister pa Asuntonan Interior y Relacionnan di Reino, particularmente e Secretario di Estado pa Relacionnan di Reino, den e caso aki, sra. Alexandra van Huffelen riba tereno di relacionnan cu e paisnan. Banda di esey, DGKR ta responsabel pa e tareanan cu ta legalmente ancra riba e terenonan aki.

Splicacion sosten y reforma

Den e documento Welkom bij BZK tin e splicacion di e sosten di likides cu Hulanda a duna, pero tambe e acuerdonan individual cu e tres paisnan pa nan propio landspakket. Ta trata di paketenan di medida pa cada un di e paisnan pa logra reformanan structural. COHO ta encarga pa supervisa ehecucion di e palabracionnan a cambio di sosten di Hulanda. Tarea di COHO ta pa sostene implementacion di e reformanan cu mester aumenta bienestar di e poblacionnan di e tres paisnan, ya cu e obhetivo ta pa yega na finanzas publico duradero y un economia resiliente.

Awor cu e rijkswet ta cla, COHO lo tin su base legal y Conseho di Minister di Reino ademas a palabra pa fortifica e supervision financiero y amplia e efectividad di tal.

Te ora cu COHO keda formalmente institui, cu su miembronan, tin e asina yama TWO, esta e tijdelijke werkorganisatie cu ta cay bao DGKR. E TWO ta traha hunto cu e tres paisnan riba e agenda di ehecucion cu ta sali di e medidanan di e landspakket. TWO ta duna instruccion riba implementacion, pero tambe otro departamentonan (di BZK) tin responsabilidad pa e trabao. Pa hopi departamento specialisa, e ta nifica un ampliacion di nan tarea y como tal BZK a pone fondo disponible via COHO pa sostene e expertonan di BZK, sin cu ta tuma nan cargo di nan responsabilidad. Asina cu COHO keda formalisa, e lo tuma e responsabilidadnan di TWO.

Fortificacion di estado di derecho

Mantencion di ordo y seguridad ta asuntonan di cada pais den Reino. Pero BZK ta stimula e fortificacion di estado di derecho na Aruba (Corsou y St. Maarten). Esey ta motibo pakico e Minister encarga ta traha hopi cerca cu e Ministernan Hulandes di Finanzas, Husticia y Seguridad y di Defensa, cu ta brinda e capacidad operacional pa sosten y fortificacion.

Por ehempel, Secretario di Estado na fin di 2020 (Raymond Knops) a pone un suma structural te cu 45 miyon na fin di 2020 te cu 2025, pa medio di e landspakketnan pa fortifica e fronteranan y ampliacion di e maneho structural contra actividadnan cu ta mina estado di derecho. E 45 miyon euro ta bin banda di e suma di 13 miyon cu e presupuesto Relacionnan di Reino tin caba pa fortificacion di estado di derecho. Un di e proyectonan principal ta e mehoracion structural den e sistema di prison na St. Maarten.

Pero e Directorado General Relacionnan di Reino ta traha hopi cerca cu otro directoradonan di BZK riba tereno di vivienda, democracia, eleccion, ademas di otro Ministerionan pa realisa e diferente tareanan den e paisnan Caribense di Reino Hulandes.

DGKR, cu su representacion na Corsou, St. Maarten y Aruba (VNO) ademas ta entrada pa e paisnan na otro departamentonan. E Ministerio pa Asuntonan Exterior y Defensa pa motibo di nan tarea di Reino tin nan mesun responsabilidad. Pero den tur momento di un crisis, DGKR tin un papel di coordinacion, tanto den region como na Den Haag, pa por brinda ayudo y sosten na e paisnan.

Grupo di trabao islanan Caribense den Reino

Tambe a lanta un grupo di trabao partinan Caribe di Reino, CdKNL, cu ta duna sosten coordina na e esfuersonan interdepartamental di BZK. E grupo di trabao aki ta di nivel halto di ambtenaar y ta bao presidencia di DGKR. E ta reuni mensualmente y ta fungi como portal pa tanto Gobierno Hulandes y Gobierno di Reino.

DGKR tin un papel di coordinacion, sosten y facilitacion den e maneho di Reino. Y como tal ta traha cu e Rft pa Corsou y St. Maarten y por lo pronto cu e LAft pa Aruba. E RAft, cu ta e rijkswet pa e colegio di supervision financiero di Aruba, a keda aproba na September 2021. Pues e enfoke ta pa traha cu e paisnan den Caribe a base di rijkswetnan di consenso, leynan di consenso cu ta nifica cu tur e paisnan ta acepta esakinan.

Gabinetenan di Gobernador

E dossier ‘Welkom bij BZK’ ta splica e personal di BZK cu cada pais tin su Gobernador cu ta representa Rey como hefe di gobierno. Gabinete di Gobernador ta un secretariado na nivel di ambtenaar (di BZK) pa sostene Gobernador cu su tareanan, tanto na nivel di Reino como na nivel di e pais. E gabinete tin un papel di conseho, informativo, y tambe pa tuma iniciativa pa Gobernador riba tereno di maneho, legislacion y ehecucion. Ministerio pa Asuntonan Interior di Hulanda y Relacion di Reino ta responsabel pa maneho di e organisacionnan aki.

VNO

E portal di Gobierno di Hulanda ta e Representacion di Hulanda na Aruba (Corsou y St. Maarten), esta VNO. E organisacion aki mester contribui na un colaboracion interno y constructivo ademas na un relacion politico administrativo transparente. VNO tin su sede na tur tres isla.