Ayera Landsrecherche, conhuntamente cu Hues-Comisario y den cooperacion cu Cuerpo Policial di Aruba, a tene entradanan hudicial na diferente luga.
E entradanan hudicial aki a tuma luga den cuadro di un investigacion penal di Landsrecherche na posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: e investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di Pais Aruba den e añanan 2009 te 2017, segun un comunicado di prensa.
Ademas ta investiga e rol di un minister anterior den esaki.
Cu sosten di Landsrecherche Curasoleño a tene tambe un entrada hudicial na Corsou den cuadro di e investigacion, segun OM ta informa.
Den e entradanan hudicial documentonan y computer a wordo tuma den beslag.
Pa awor no a haci ningun detencion.
Den e simannan venidero e team di investigacion lo entre otro, analisa e contenido di e administracion y e computernan, y sigui pa scucha sospechosonan y testigonan.
E investigacion ta ainda den un fase inicial.
Ministerio Publico no kier, ni por bisa na e momento aki ainda si despues lo tin detencion di un of mas sospechoso. Esey ta depende entre otro di e resultadonan di e investigacion.
Ministerio Publico lo no duna mas informacion tocante e identidad di e sospechosonan y/of di e sospechonan specifico cu ta existi contra nan.
