Ministro plenipotenciario nombra… Manera Statuut ta bisa…

Gobierno di Aruba a cumpli cu algo cu te ayera tabata parce cu no lo a cumpli cune: nombra un ministro plenipotenciario na Hulanda. Y nan a haci bon trabao, nombrando un persona cu un carera y reputacion intachable, realmente un di e mihor, o talvez e mihor escogencia cu por a haci actualmente. E ministro nombra conoce Den Haag, unda e mester bay opera, hopi bon, en vista di su anterior funcion te na 2023 como Aruba su representante den Raad van State, e conseho constitucional asesor di gobierno di Reino. Di e banda ey un palabra di elogio pa e paso positivo aki, y ta di spera cu e persona elegi lo por pone e representacion na Hulanda na e nivel necesario.

Esaki no ta kita nos asombro cu te recien ainda gobierno, aparentemente, tabata mantene e tesis cu ta bien posible di continua cu e opcion – di propio invento – di un ministro encarga cu asunto di Reino cu tabata biaha pa cada reunion mensual di Conseho di Ministro di Reino, o ta designa un funcionario publico di Aruba pa representa e pais den dicho reunion. Manera nos a comenta den un Editorial reciente, esey tabata ignora e otro tareanan cu e ministro plenipotenciario tin, segun stipulacion di e propio Statuut, cu ta duna e cuadro legal pa funcionamento di e ministro plenipotenciario. Esaki tabata base tambe di nos opinion cu gobierno di Aruba tin un obligacion di tin un ministro plenipotenciario na Hulanda, pero cu no tin sancion defini y stipula pa cu esaki. Esey ta implica cu solamente presion moral den seno di e propio Conseho di Ministro di Reino lo por a yuda pa coregi e rumbo cu gobierno di Aruba a scoge. Nos por imagina esey tambe, pasobra imagina cu no ta haci nada y pa un periodo di gobernacion completo e asunto ta keda asina. Esey lo por a hiba na e situacion unda e dos otro paisnan autonomo den Reino tambe lo por a opta pa e forma aki. Nos ta consciente cu nos probablemente nunca lo haya sa cu e conversacion serio y confidencial den e seno ey a tuma lugar, pero esey no ta asina relevante tampoco; e resultado obvio cu gobierno di Aruba a coregi su actuacion den e asunto aki ta mas cu suficiente. Y si pa calma e tension interno politico den e gabinete tocante posible candidato a haci e escogencia menciona, mihor ainda…

Fast ferry un opcion viable?

Cambiando di tema, nos ta atende otro asunto cu a bolbe den luz publico recientemente. Ta trata di e publicacion di gobierno di Aruba di un solicitud di interes pa oferta di un ‘fast ferry’ entre Aruba y Corsou. Ta importante duna algun detaye mas di e destaho. Ta trata di pedido di un investigacion pa establece e condicionnan publico, economico, huridico y tecnico di e viabilidad di tal proyecto, cu ta concerni un “ferry di pasahero”, loke por conduci na un ‘Request for Proposals’ pa eventual seleccion di un operador adecua. Un promer observacion aki ta cu gobierno, mas exacto ministro encarga cu finanzas, asunto economico y sector primario, corectamente a tuma un paso cauteloso, optando pa cuminza cu explora kico tin y no cuminza cu un roadshow politico, mientras no tin claridad con e asunto lo bay. Esey ta di aprecia y lo mester warda resultado di e analisis referi. Mientras tanto, nos no ta obliga di sinta keto pero por haci nos propio research preliminar den esaki. Ya cu ta trata explicitamente di un ferry di pasahero, esey automaticamente ta elimina un ferry pa vehiculo/carga. Esaki ta significa cu di antemano a analiza y tuma e decision cu no mester bay den direccion di un ferry asina. Den pasado na diferente ocasion nos a expresa e duda si lo tabatin un volumen di vehiculo y carga entre e islanan, cu por a hustifica un opcion asina. Ta positivo pa mira cu den e actual acercamento ya a elimina e opcion ey anto. Awor cu ta trata solamente di un ferry pa pasahero, ta mas facil pa visualiza esaki.

Riba internet por topa cu un cantidad di informacion di fast ferry pa pasahero, pero den e fase aki nos no ta bay menciona ningun empresa. Nos por bisa si cu por trata di embarcacion, por ehemplo di estilo ‘catamaran’, cu por transporta sigur entre 200 – 400 pasahero, unda tin cu ta alcanza un velocidad entre 30-40 nudo nautico (55 – 75 km/h), loke por garantiza un tempo di biahe faborable entre e dos islanan. Claro cu tin un cantidad di detaye tecnico cu nos no por discuti aki, pero otro aspecto si. Por ehemplo: kico ta e potencial volumen di pasahero, tanto di persona local como turista. Pa cuminza, mester tuma na cuenta cu fuera di e biahe, lo mester percura pa transporte na e otro banda, pasobra no por hiba e propio vehiculo. Esey no mester ta un obstaculo, dependiendo di nivel di prijs naturalmente. Di banda di turista, esaki por ta un opcion pa colaboracion mas estrecho entre e islanan, sigur awor cu na Corsou tambe turismo ‘stay-over’ a crece considerablemente, di casi 800.000 pa aña (788.000 na 2025) loke por crea un base conhunto di mas di 2 miyon bishitante pa intercambio di bishita entre e islanan. Por tin un base realistico anto pa un tal proyecto, y lo ta logico cu lo ubica tal proyecto na San Nicolas, unda e posibilidadnan portuario ta hopi mas amplio cu e proyecto aki. Pero esey lo keda pa otro ocasion.