Temporada di calor ta acercando y varios pais den Europa ya ta sintiendo e efectonan grave di olanan di calor. Francia, Inglatera y Hulanda ta entre varios pais cu a reporta temperatura halto record—10 pa 15 grado mas halto cu normal—y algun caso fatal relaciona cu olanan di calor cu ta pasando den e continente. Aunke te ainda e hemisferio occidental no ta sintiendo mucho calor, e situacion climatico na otro banda di mundo ta señala cu nos mester ta preparando pa e temporada di calor binidero. Pa Aruba, esaki ta specialmente relevante, ya cu nos a mira den e ultimo añanan con calor extremo por ta peligroso pa nos salud y con e ta crea mas presion riba nos grid di coriente nacional.

E ola di calor den Europa a cuminsa apenas siman pasa, y paisnan afecta a registra temperatura yegando 30 grado celsius (algun pais registrando temperatura mas halto). Na Inglatera, temperatura a yega casi 35 grado den algun parti. Portugal a enfrenta te 42 grado celsius den algun ciudad incluyendo capital Lisbao. Na Hulanda, e dia mas calor tabata 26 di mei, unda un stacion na de Bilt a registra 30,4 grado. Y na Ell, un pueblo den provincia Limburg, a midi e calor na 30,7 grado celsius.

E olanan di calor den Europa a cay rond e mesun periodo cu aña pasa, unda e registra e prome ola di calor grandi dia 22 di mei—cinco dia prome cu esun di e aña aki. Esaki ta mustra un tendencia nobo den clima global; temporada di calor ta drentando mas trempan y mas severo. Pa paisnan chikito manera Aruba cu infrastructura menos fuerte, temperatura extremo ta crea riesgo pa seguridad, salud y bienestar di pueblo.

Aña pasa, olanan di calor a cuminsa afecta e hemisferio occidente casi un luna despues cu e registra e prome den Europa fin di mei. Den Caribe, temporada di calor a cuminsa rond mesun periodo, y aña pasa Aruba a registra un ola di calor fin di juli. Cu esaki, preocupacion a surgi tocante salud publico y stabilidad den suministro di coriente.

Den un comunicado di DVG publica comienso di augustus 2025, a enfatisa cu calor extremo por trece riesgo serio pa salud, specialmente pa e grupo vulnerable manera mayornan di edad, mucha chikito, hende cu malesa cronico y esnan cu ta traha pafo.

Den un rapport di CBA publica na december 2025, e riesgonan aki ta ser aumenta door di e condicionnan di clima di Aruba, caminda temperaturanan halto hopi biaha ta combina cu humedad eleva. E cuadro di salud y seguridad na trabao existente no a ser diseña cu e nivel aki di exposicion sosteni na calor den mente, lagando hopi trahador insuficientemente protege segun cu e condicionnan di clima ta intensifica, segun e rapport.

Pa loke ta uso di coriente, durante temporada di calor ta nota un aumento skerpi den suministracion pa acomoda casnan cu ta laga airco y fan cendi durante henter dia. Den e ultimo añanan, Aruba a ser plaga pa varios ‘blackout’ cu na varios ocasion a laga e isla sin coriente pa oranan largo. Durante temporada di calor, frecuencia di blackout por empeora e riesgo riba salud y bienestar di ciudadanonan, specialmente adultonan mayor cu ta menos mobil.

Mirando e riesgonan cu nos por enfrenta, ta importante pa autoridadnan cuminsa tuma medidanan preventivo pa maneha e temporada di calor binidero. Ciudadanonan tambe mester prepara pa e calor di temporada cu ta acercando, por medio di tuma medida pa protege salud y bienestar di bo y di esnan rond di bo.

Ta importante pa Aruba keda resiliente contra temporada di calor extremo, cual aña pa aña ta drentando mas trempan y mas fuerte.