Diasabra ultimo a tuma luga e concurso di beyesa mas popular, esta Miss Universo na unda e representante di Nicaragua, Sheynniss Palacios a keda corona como e muhe mas bunita den e universo. E aña aki Aruba a wordo representa pa Srta. Karol Croes, kende sigur a haci su maximo esfuerso pa laga Aruba su nomber na halto durante e certamen aki.
Ayera tardi Karol a yega Aruba despues di su gran desempeño na El Salvador cargando Aruba su nomber na su pecho. Karol a sa di luci durante e certamen y a ricibi hopi atencion di medionan di comunicacion Latino, entro otro Telemundo, cu ken el a realisa algun entrevista incluso prome cu el a biaha pa El Salvador.
Na su yegada Karol a wordo ricibi pa un famia-, amistad- y fanaticonan cu a ricibie cu un caluroso bon bini. Den declaracionnan na medionan local presenta, Karol a splica cu e experiencia tabata uno inolvidable, uno yena cu aprendisahe y tambe di oportunidad pa por crece, no solamente den e ramo personal, pero tambe den e ramo profesional.
No tin duda cu Miss Universo ta un certamen yena cu muhenan bunita di diferente parti di mundo. Karol a remarca cu pa ta memey di tanto muhe bunita “ta haci bo reflexiona e bunita cu abo mes ta y cual ta e cualidadnan di berdad cu bo tin.”
El a expresa cu e ta hopi conmovi tambe y wantando duro pa no yora, pasobra e tabata hopi emociona pa wak su isla asina contento.
Por ultimo Karol a duna un mensahe special na su mama, kende a compañe di principio te final den e experiencia aki. “Mami mi stima bo cu henter mi curason, danki pa tur e apoyo. E tabata cu mi for di principio te na final na El Salvador. Tambe ta hopi importante pa nos busca loke ta haci nos feliz pasobra ora bo ta berdaderamente feliz, ta e momento cu bo por haci e mundo un miho luga.”
