(Hola) – Bianty Rojer-Gomperts, Miss Universo Curaçao 2026, ta bayendo Miss Universo 2026 na Puerto Rico cu un sentido cla di proposito. Su preparacion a ta un maraton, exigiendo disciplina, sacrificio y perseverancia.

Pero Bianty no ta un desconoci na e mundo di certamen di beyesa. Varios ta cord’e como e first runner-up di Miss Universo Curaçao 2023, y despues el a competi na Reina Hispanoamericana 2025 na Bolivia.

Awo, cu 28 aña, e ta subiendo escenario internacional cu un perspectiva hopi mas maduro. Pa Bianty, beyesa por habri porta, pero loke realmente ta importante ta e mensahe cu bo ta carga y e impacto cu bo ta laga riba otronan.

Den un entrevista cu ¡HOLA! Américas, Bianty a papia tocante e muhe cu e ta fuera di escenario, compartiendo e experiencia personal cu a forma ambos su bida y su plataforma. Su mama ta bibando cu Alzheimer’s, un diagnosis cu a cambia mundo di Bianty y na final tabata e inspiracion pa e boga pa dunadonan di cuido, particularmente esnan cu ta sinti abruma of nan so.

Su perseverancia, habilidadnan di comunicacion y compromiso den crea un impacto positivo a dun’e un mision cu ta extende mas leu cu gana un corona. Mientras e ta prepara pa Miss Universo, Bianty ta spera cu e por carga un mensahe di resiliencia, conexion y proposito na un audiencia internacional.

Ora a puntra Bianty con e preparacion pa Puerto Rico ta bayendo, Bianty ta conta cu e preparacion ta bayendo extremadamente bon. “E ta un marathon. Tin dia cu mi ta sinti untiki casa, pero e ta forma parti di e proceso. Nos ta humano y nos tambe mester tempo pa recarga y sigui cana. Pa mi e ta un responsabilidad. Mi ta mir’e casi como aplica pa un trabao pa motibo cu na final di dia, mi ta representando Corsou. Mi ta bay aya pa haya e trabao y e oportunidad di representa riba un escenario global.”

E parti mas dificil di su caminda pa Miss Universo ta “pasa asina hopi tempo leu di mi famia. Mi ta extremadamente cercano na nan, specialmente mi wela, mi tanta, tio y mi primonan. Mi ta biahando rond di mundo, y mi ta increiblemente gradici pa e oportunidad aki, pero tambe mi ta haya falta di ta na cas. Te hasta for di un distancia, mi sa cu mi famia ta manda nan energia y ta sostene’mi.”

A pesar di tur loke el a prepara pa e competencia, un di e mensahenan mas fuerte cu tin tras di dje ta su perseverancia. Bianty a comparti cu “si, perseverancia, den e sentido cu mi nunca a rindi, pero tambe pa motibo cu mi ta yiu di un mama cu tin Alzheimer’s. Mi no a permiti e experiencia ey of e periodo ey di mi bida defini mi. Pero den cierto manera, el a definimi. El a forma ken mi ta y a yuda’mi bira un persona resiliente cu conviccion.”

El a agrega cu e sa cu e tin “proposito cu ta bay mas leu cu e corona pa motibo cu “eventualmente, bo tin cu entrega e corona na otro persona. Pero bo ta laga un marac riba un persona su curason, cu pro keda cu nan pa semper. Esaki ta loke mi kier haci dentro di e comunidad di dunado di cuido. Mi ta un dunado di cuido mi mes. Mi sa kico e ta nifica pa sinti bo so hasta ora cu realmente bo no ta bo so. Tin biaha nos mente por ta nos pio enemigo y convence nos cu nos no tin ningun hende.”

“Mi kier ta e amiga cu ta recorda dunadonan di cuido cu nan no ta nan so. Bo por pidi ayudo. Bo por haci pregunta ora cu bo no sa kico pa haci. Nos tur ta conecta y mi por garantisa hende cu tin un hende rond di nan cu ta cla pa yuda. Tin biaha, bo djis tin cu hisa bo man y puntra.”

Potretnan di Hola