(Infobae) – Un team di investigadornan di Massachusetts Institute of Technology (MIT) a crea un dispositivo hibrido y escalabel cu por genera señalnan cuantico pa radar y sensor na temperatura ambiente.
E avance ta usa magnon y foton di microonda pa transmision y deteccion di señal, y por transforma desaroyo di tecnologia pa procesamento avansa di señal y comunicacion sigur.
Un di e bentahanan principal ta cu e sistema no tin mester di ekipahe grandi y costoso pa friamento, algo cu normalmente ta necesario pa dispositivo cuantico.
E desafio di tecnologia cuantico y temperatura
Mayoria di sistemanan di radar di alto rendimento ta logra detecta señalnan extremadamente debil mediante uso di foton di microonda, particulanan fundamental den e tipo di proceso aki.
Cientificonan frecuentemente ta usa dispositivonan conoci como union Josephson, cu por parti un foton di microonda den dos señal relaciona: un pa transmiti informacion y e otro pa descodifica e señal.
E unionnan aki ta parti di circuitonan superconductor, cu ta usa ampliamente den rednan di comunicacion sigur.
E problema ta cu e circuitonan mester opera na temperaturanan extremamente abao, cerca di -273 grado Celsius, pa funciona corectamente.
Pa logra esaki, ta necesario usa criostatonan industrial grandi cu ta consumi hopi energia y ocupa bastante espacio.
Descubrimento: magnon y microonda sincronisa
E team lidera pa Luqiao Liu, profesor asocia den Departamento di Ingenieria Electrico y Ciencia di Computacion di MIT, originalmente tabata investigando otro aplicacionnan ora nan a descubri cu e señalnan di microonda relaciona por ser genera sin usa circuito superconductor.
Enbes di esaki, nan a logra usa un sistema magnetico.
E metodo ta funciona door di pone un capa magnetico dentro di un resonador di microonda. E configuracion ta permiti parti fotonnan di microonda cu ta drenta den dos señal sincronisa cu frecuencia diferente, y tur esaki por pasa na temperatura ambiente.
E dispositivo ta usa magnon, cu ta paketenan chikito di energia magnetico.
Ora fotonnan di microonda interactua cu e sistema magnetico, dos magnon di e mesun frecuencia ta ser genera. Despues, nan ta ser separa: un ta ser usa pa transmision di señal y e otro pa deteccion.
Un dispositivo hibrido cu por aumenta seguridad
E avance tecnico a permiti e team crea ondanan hibrido magnon-foton cu tin frecuencia di microonda sincronisa pero diferente.
Esaki por ofrece un bentaha importante pa seguridad, pasobra un posible atacante no por descodifica e señal sin sa e frecuencia corecto, cu ta funciona manera un tipo di clave.
“Sistemanan magnonico tin un rango extraordinariamente amplio di dinamica no lineal, pero te awo esaki no tabata ser probecha pa aplicacionnan practico,” Liu a bisa den un comunicado di MIT.
Segun Liu, door di usa e conexion entre magnon y foton di microonda, e team a logra separa e frecuencianan di e magnonnan y asina diferencia e canal di transmision for di e canal di deteccion.
E investigacion por eventualmente yuda crea radarnan cuantico, sensornan mas sensitivo y sistemanan di comunicacion sigur cu ta mas facil y menos costoso pa opera, pasobra nan no ta depende di friamento extremo.
