Recientemente Parlamento di Aruba trata e cambio di ley pa introduccion di salario minimo pa ora (minimumuurloon). Durante e reunion publico aki, lider di fraccion MEP, parlamentario Evelyn Wever-Croes a entrega un mocion den cual e ta presenta e deseo pa reduci e oranan di trabao y cambia e siman di trabao di 5 dia, pa 4 dia pa siman.
Contestando algun pregunta di Bon Dia Aruba, parlamentario Wever-Croes a splica cu basa riba estudionan internacional haci y sondeo realisa na Aruba tambe, ta resulta cu ora cu trahadonan traha menos ora pa siman, e ta trece beneficio cune tanto pa e trahado como pa e doño di trabao.
El a sigui splica cu e trahado no ta bay atras den salario, ta mantene su beneficionan y ta traha menos ora, loke ta nifica cu e trahado tin mas tempo pa famia, pa su mes, pa su desaroyo personal y pa su salud. Pa e doño di trabao, el a indica, cu e ta trece beneficio di menos AO, pero tambe mas productividad pasobra estudionan ta mustra cu ora un trahado tin menos ora pa traha e ta traha mas efectivo.
Wever-Croes a señala cu esaki a ser haci na algun pais grandi como piloto y na Boneiro ya caba ambtenaarnan ta traha 36 ora pa siman, caminda e ambtenaar ta scoge si e ta traha nuebe ora pa dia durante cuater dia of si e ta traha ocho ora pa dia cuater dia y e di cinco dia e ta traha mitar dia.
“Basa riba estudionan ey e sondeonan cu a ser realisa ta indica cu na Aruba e lo duna mas o menos e mesun resultado. Nos a pone den nos programa di campaña pa traha riba dje e siguiente cuater añanan ki,” el a remarca.
Parlamentario Wever-Croes a bisa cu fraccion MEP a pasa e mocion den parlamento den cual a splica e beneficionan y a pidi minister di Labor, Wendrick Cicilia (AVP), pa haci un estudio y den tres luna e lo mester regresa parlamento pa splica con lo implementa e cuater dia di trabao aki na Aruba.
El a sigui splica cu esaki lo sucede den fase pa yega na cuater dia di trabao. El a indica cu a pidi minister Cicilia pa cuminsa den sector publico, pasobra como doño di trabao e por duna ehempel y aplica esaki den sector publico sin cu e ta afecta e servicio, pero cu alabes ta probecha di e productividad mas halto di e trahado.
“A pidi minister pa cuminsa den sector publico y dentro di tres luna e mester informa con e ta bay implementa esaki den sector priva si e ta posibel,” el a agrega.
Wever-Croes a subraya cu na Aruba tin hopi reto den e mercado laboral, entre otro e scarsedad di trahado, cual no solamente ta afecta sector priva pero tambe sector publico. Pero el a agrega cu tin varios pais tin estudionan haci cu ta mustra con e paisnan ey ta atende cu e reto di scarsedad di personal.
“Pa cada problema tin un solucion. Pa e problemanan aki tambe tin un solucion si di berdad bo kier duna bo ciudadanonan un miho calidad di bida. E ta mocion cu a ser presenta, un deseo pa gobierno explora e posibilidadnan y dentro di tres luna informa nos. Y loke nos ta hopi contento ta cu el a pasa cu e mayoria den parlamento. Dentro di tres luna ta spera un contesta serio di e minister si por implementa esaki y con lo por implement’e pa yega na dje. Mi ta kere e ta deseabel y mi no por imagina mi tin un hende cu ta haya cu e no ta deseabel con tal cu por atende bon cu e retonan cu tin riba caminda,” el a enfatisa.
Preocupacion y critica
Pa loke ta preocupacion cu gremionan a expresa, parlamentario Wever-Croes a indica cu gremionan mester haci un estudio y busca informacion pa asina nan por duna nan comentario riba e tema. El a enfatisa cu parlamento tin un deber di scucha kico ta biba den comunidad y a base di e deber ey parlamento tin e derecho di bin cu proposicionnan.
“Esaki ta un proposicion haci na gobierno y awor gobierno mester bay haci su trabao y den e trabao ey claro cu gobierno mester consulta cu gremio. Mi ta contento di scucha cu gremionan ta critico. Mi tabatin impresion cu gremionan tabata hopi na soño ultimamente pasobra hopi cos a pasa na Aruba sin cu a scucha di gremionan , pero mi ta contento cu nan a lanta for di soño y esaki ta un bon bijkomstigheid,” el a finalisa.
No ta gremionan so a expresa nan critica pa e proposicion presenta pa reduci oranan di trabao. Riba rednan social tambe ciudadanonan a expresa nan critica. Algun critica cu a bin dilanti ta cu den varios departamento di gobierno ya caba e servicio no ta optimal y reduccion den ora y dia di trabao lo haci cu no lo tin suficiente servicio.
Otro ciudadano a expresa cu como pagado di impuesto e ta spera di ricibi un bon servicio, pero awor e ta keda paga mesun impuesto y lo ricibi menos servicio. “Kiermen ta paga mesun hopi pa hende traha menos?” el a cuestiona.
Di otro banda tin otro ciudadano cu a indica cu e hecho cu e mocion a ser aproba cu mayoria den parlamento, y sobretodo cu el a conta cu sosten di fraccionnan di coalicion AVP y Futuro, ta mustra cu den esaki politiconan si a cera cabes pasobra e ta beneficia nan mes, pero no ta bin hunto di e mesun manera ora ta beneficia pueblo di Aruba.
