Den e edicion di diamars 08 di januari y e edicion di awe nos ta dedica atencion na e caso Aruba Airlines, pa loke ta e denuncia na Nacionnan Uni di colaboracion cu e regimen comunista di Cuba pa deporta forzosamente activistaanti-gobierno. E caso aki no solamente ta hala atencion pa un forma di opera, cu pa diferente motibo ta cuestionable, sino tambe pasobra e ta habri nos wowo pa tene mas cuenta con posiblemente nos teritorio ta ser mal usa pa operacionnan empresarial cu no ta ‘kosher’. Y den esey tin diferente caso den ultimo añanan.

Na prome momento e caso aki, di e compania di aviacion, a hala atencion pa e asunto mes di e posible colaboracion di e compania cu autoridadnan Cubano den deportacion di disidente. Na mita di aña pasa ya nos a haya documentacion tocante e denuncia aki y a publica na luna di juli 2019 tocante esaki. Den e lunanan despues di un manera e denuncia a yega Nacionnan Uni, cu a tuma e caso na serio y a cuminsa investiga y haci e preguntanan al caso, tanto na gobierno di Cuba, como Aruba y Hulanda, cu na nomber di Reino ta e responsable final pa duna cuenta na e organisacion internacional. Conociendo e manera di atende e asuntonan aki lo bay tin un investigacion y un reportahe adecua, contestando tambe e preguntanan cu a surgi den parlamento Hulandes.

Mientras tanto e compania a desmenti e acusacionnan, bisando cu e personanan a cumpra nan ticket nan mes y no a duna e impresion cu tabata trata di expulsion forzoso. Di banda di e denunciantenan ta bisa lo contrario, mientras Nieuwsuur ta declara cu nan tin documento cu ta indica cu e denunciantenan por tin razon. Esey ta un aspecto. E otro ta e asunto di cumplimento cu leynan di Aruba, como compania funda y estableci aki. Aki ta bin dilanti algun cos cu ta tira un luz poco straño riba forma di opera di e compania, y e forma di (no) controla di nos autoridadnan. Manera Nieuwsuur tabata conta den nan programa di television, nan no a logra haya prueba na Aruba pa e rumor, cu lo ta trata di un compania cu mientras tanto tabata pa 100% den man di stranhero, y cu ademas no tin Aruba como su sede principal, sino cu di exterior ta maneha operacion. Como cu na Aruba no tin transparencia completo di Registro Mercantil, pa mayoria di compania ta solamente posible pa autoridadnan competente haya acceso na e registro di accionista di e compania. Pa nan sorpresa finalmente Nieuwsuur a haya prueba di e compania mes.

Tambe nos a bin topa cu un documento di Aruba, e decreto via cual Aruba Airlines a haya licencia pa opera. E documento aki ta bisa claramente cu accionnan di e compania na cualkier momento mester ta por lo menos pa 70% den man di persona residencia na Aruba. Pregunta: ta ken ta controla esaki? Y ta ken ta comproba si e compania ta cumpli cu e otro requisito di tin su sede principal di operacion na Aruba? Un simple yamada na e oficina na Aruba ya ta duna e impresion cu esey no ta e caso, pa e dificultad pa haya un persona autorisa na telefon. Ta mas probable cu e maneho superior ta sea na Caracas o na Miami, no aki. Y tin algo mas. Den loke yama e ‘Bleidsregel Exploitatie Vergunning en AOC’ ta para cu Directie Luchtvaart, pa otorga (y mantene) e permiso mester controla e compania pa loke ta e reglanan di “daadwerkelijke zeggenschap”. Esaki ta implica cu e berdadero poder di decision (‘daadwerkelijke zeggenschap’) mester ta den man di residente di Aruba. Ni Insel Air, ni Aruba Airlines tabata cumpli cu e requisito aki. E caso di e Venezolano naturalisa Mericano cu ta propietario exclusivo di e compania, a pesar di e construccion cu un holding como propietario directo, tabata conoci pa basta tempo caba.

Ta parce awor cu a core duna contesta riba e preguntanan haci pa e medio Hulandes, sin cu tabatin un debido analisis di e situacion. Esaki nos ta haya ora nos no tin un sospecho ‘saludable’ pa e tipo di compania aki, cu den e era di salida di miyones di hende di e pais bisiña grandi, cu sigur ta consisti pa gran parti di hende confiable, pero nos no por kere hende pa nan cara. Y sigur ora ta trata di inversionista, ta importante pa averigua prome di ki tipo di hende ta trata. Asina nos a haya nos cu varios caso di empresario menos confiable, cu a bin inverti placa di cual no ta sigur cu e ta procedente di origen limpi. Naturalmente esaki ta dificil pa detecta, y sigur na prome momento, pero cu e control deficiente cu nos tin, en general, ta facil pa haya nos cu problema manera esaki.

Di tur manera, awor nos por comproba cu pasobra no ta impone regla estricto y obliga esnan supervisa pa cumpli tambe, varios aña despues nos ta bin topa cu e problema, y berguensa, pa nos pais. E compania por keda desmenti e sucesonan na Cuba, nan no por haci esey cu loke a keda comproba pa loke ta regla basico di nan permiso. Ken ta bay actua?