Mester determina cua ta e costonan cu consumidornan ta haci ora cu paga cu debit y credit card, pero tambe si tin competencia husto den e mercado di cuminda na Aruba.

Aruba Fair Trade Authority, AFTA, cu tin e tarea pa supervisa cumplimento cu e ley riba competencia husto tin un cantidad di investigacion andando na interes di consumidor di Aruba.

Un di e investigacion ta riba e gasto pa uso di carchi di pago. Motibo ta cu e autoridad, conoci como AFTA, a ricibi diferente señal na 2024 riba e servicio di banconan. For di diferente mercado a bin indicacion riba e aumento di tarifa di transaccionnan di pago ora di haci uso di debit of credit card. E autoridad como tal a acerca e banconan comercial di Aruba cu e peticion pa colabora na un investigacion riba e tarifanan di transaccion bancario.

Obhetivo di e investigacion tabata pa determina e costonan real cu clientenan tin ora cu nan paga cu nan carchi. Tambe kier saca afo cua ta e cambionan di costo pa comerciante y kico ta e argumento pa esakinan. Algo cu ta tarea di e autoridad encarga cu competencia husto, ta pa mira con leu ta papia aki di poder di tur esnan envolvi y con ta usa e poder aki, ademas di haya miho bista con mercado y nivel di competencia ta funciona. Finalmente AFTA kier sa si a kibra e ley di competencia husto of no.

E proceso investigativo a inicia na Januari, y a acerca banconan local un biaha mas pa duna informacion cu tabata falta of material adicional. Durante lunanan di Maart te cu Mei a traha riba e datonan, a analisa e proceso y a haci investigacion adicional. Na luna di Juni a pone enfasis riba e rednan internacional di pago cu carchi y nan efecto riba banconan local. Te na fin di Juli ainda, AFTA ta wardando riba algun banco pa mas dato. E intencion ta pa AFTA entrega e rapport final cu resultado di e investigacion, cu recomendacionnan.

Conseho concepto di ley proveedornan di servicio di pago y sistemanan di pago.

Minister pa Asuntonan Economico na November 2024 a acerca AFTA pa conseho riba dos concepto di ley riba regulacion di trafico di pago na Aruba. AFTA a presenta un peticion por escrito pa ricibi e concepto, particularmente pa e investigacion riba tarifanan pa transaccion bancario. E autoridad a ricibi copia di e conceptonan di ley for di Banco Central di Aruba, como tambe e splicacionnan (Memorie van Toelichting). Despues di a confirma cu Minister cu a ricibi e conceptonan di ley, a sigui reunionnan cu CBA riba contenido di articulonan relevante. Minister entre tanto a ricibi e conseho di AFTA riba e dos conceptonan di ley.

E otro investigacion ta riba e reglanan di competencia entre companianan cu ta bende ‘real estate,’ esta biennan inmobilario, manera tereno, edificio y cas. AFTA a tene un intervencion na 2024 riba Aruba Association of Realtor (AAR) riba e importancia pa evalua kico e efecto di e intervencion ta. E autoridad a ricibi señalnan na 2024 riba guia y practica di reparticion di comision, como tambe standard pa e entrada di e realtor y e prijs di referencia (courtage and referral fees). Despues di un combersacion cu AAR, e asociacion a hala su guia y regulacionnan aden y a comunica esaki na su miembronan.

Met di e investigacion tabata pa mira con ley tin un continuacion informal y concreto di e palabracionnan cu segun e asociacion no ta conta mas; determina si tin suficiente espacio pa negociacion riba e porcentahenan di locual e bendedor ta cobra y e reparticion di e comisionnan. AFTA tabata kier miho bista riba con leu e circunstancianan di mercado tabata igual pa miembronan y esnan cu no ta miembro. Tambe kier determina si tin motibo pa haci intervencion y percura cu ta cumpli cu e ley di competencia husto.

E lunanan di Mei y Juni a keda dedica pa investigacion inicial, y e resultadonan a keda analisa na Juli y Augustus, y e luna aki ta brinda oportunidad pa partidonan trece nan puntonan di bista. E conclusionnan lo keda presenta na October.

Investigacion transporte di container

AFTA tambe a inicia un investigacion riba transporte di container, como parti di e ‘Investigacion riba prijs y structura di mercado den e sector di cuminda na Aruba.’ For di esey ta resulta cu un gran parti di e cuminda for ta trece for di Merca ta yega aki cu un solo compania di transporte maritimo, esta King Ocean, cu ta e unico cu ta nabega e ruta. Tur partido na Aruba a indica cu e costonan di transporte ta halto y volatil, entre otro pa motibo cu no tin competencia y pasobra e containernan ta bolbe bashi. Esaki tin consecuencia directo pa prijs di cuminda na Aruba.

Meta di e investigacion ta pa haya bista den e disponibilidad y forsa di competencia pa posibilidad alternativo di transporte pa e ruta Merca-Aruba. Tambe kier haya un imagen di e impacto economico di dependencia riba King Ocean riba importadonan y consumidornan. AFTA kier haya informacion riba e influencia di e poder di mercado di King Ocean riba prijs; disponibilidad di otro companianan cu por ta interesa pa den e ruta; compronde e nivel con desaroyo mundial, manera tension geopolitico, cambio di clima y otro aspecto cu ta influencia tarifa; y finalmente saca afo con ley tin indicacion di accion pa stroba competencia, manera maluso di posicion di poder y formacion di cartel. E conclusion di e investigacion lo keda raporta na November.

Otro investigacion riba sector di cuminda ta acuerdonan exclusivo. AFTA a haya indicacion cu algun importador y distribuidor ta poder riba mercado y ta actua contra importacion paralelo, a pesar cu esaki ta legal. Esaki a pone cu e autoridad a inicia un investigacion mas intenso riba e tipo y efecto di acuerdonan exclusivo di distribucion den mercado di Aruba. AFTA kier haya mas informacion riba e impacto positivo of negativo di e acuerdonan aki y cua ta e posibel efectonan negativo, manera aumento di prijs y con leu ta kibra e ley di competencia husto. E rapport mester ta cla e luna aki.