Monseñor Luis Secco Ta benida di Hesus nos ta celebra y no otro cosnan

Mañan den cuadro di celebracion di Pasco di Nacemento, Monseñor di nos diocesis, Luis Antonio Secco a declara den su mensahe di Advent cuater aspecto cu henter Iglesia rond mundo y tambe Papa Francisco, y anteriormente Papa Benedicto a trece dilanti. Esta cu ‘Advent ta un temporada di encuentro cu Señor cu ta bini.’

Monseñor Secco a declara cu e prome aspecto tin di haber cu e palabra: vigila. Kiermen ta alerta y atento, manera Hesus ta bisa: “Sea spierto pa boso ricibi Hesus den sentido spiritual.”

El a splica cu esaki ta referi tambe na e comparacion cu Hesus ta haci, caminda bo no sa ki dia y ki ora e ladron ta drenta boso cas. Mas cu logico cu bo no ta permiti pa e drenta kibra trankilidad y siguridad di bo cas. Pues esaki ta e alerta cu e ta referi na dje, y cu ta nifica spiritualmente cu bo mester haci oracion y mustra solidaridad cu bo prohimo.

E di dos aspecto ta: conversion. E ta nifica cu bo mester wak kico ta aleha bo di Dios y for di bo famia. E religioso a splica cu tin biaha nos ta critica y nos ta papia robes. Tin hende cu a rabia cu otro, y esaki ta net un temporada pa haci bon cu otro. Ta importante pa mantene union familiar no solamente pa celebra Pasco y Aña Nobo, sino pa trece mas union.

Tambe e temporada y celebracion di Pasco di Nacemento ta uno di speransa, pasobra nos ta spera e yegada di Hesus. Monseñor Secco a bisa cu ta importante pa no pega bo curason na cosnan material nada mas.

“Tin biaha nos ta biba den un mundo materialista awendia y nos ta lubida cu e centro di nos atencion ta cu nos ta spera Hesucristo,” Monseñor Secco a bisa. E ta haya cu tin biaha nos ta lubida esey, y tin hopi cosnan material cu na final nos no ta corda cu ta Hesus nos ta celebra y no otro cosnan.

Finalmente, Monseñor Secco a referi cu e temporada aki ta uno di alegria. Den Pasco di Nacemento semper nos ta mira cu hende ta dorna cas, prepara pesebre y e muchanan ta feliz cu e fiesta aki, pasobra e ta un fiesta di famia.

“E ta un fiesta di ricibi Hesus. Semper cu un yiu nace tambe ta alegria pa un famia,” el a bisa.

Den e caso aki celebracion di Pasco di Nacemento ta recorda nos cu ta Hesus esun cu a nace den sentido spiritual. Pues Pasco di Nacemento ta un bunita ocasion pa renoba e legria y deseo di sigui y traha como hende y como Cristian.