Diahuebs a tardi a tuma luga e inauguracion di e restaurant nobo cu ta situa na e edificio na Steenweg 19, conoci como ex-botica Aruba, un monumento historico cu ta cay bao Stichting Monumentenfonds Aruba (SMFA). Despues di e restauracion di e exterior cual a termina na 2021 y aña pasa yega na un acuerdo cu KOAL Restaurant y asina a cuminsa cu e renobacion di e interior di e piso abou di e edificio.

“Stichting Monumentenfonds Aruba ta sumamente orguyoso cu awe a yega e dia cu nos por anuncia cu nos a keda cla cu full e restauracion di e edificio di ex-Botica Aruba den Steenweg 19,” directora di SMFA, Anne Witsenburg, a expresa.

Witsenburg a indica cu esaki ta bay duna un bida nobo na e monumento y e ta bay tin dos funcion nobo. Uno ta KOAL restaurant, situa na e piso abao, cu a habri su portanan y e otro ta Cocolishi studios cu ta bay ocupa e piso di ariba. E parti aki nan ta trahando riba dje ainda y ta spera cu dentro di algun luna pa celebra e apertura di esaki tambe.

“Di nos parti nos kier a desea Tony cu Albert hopi exito cu e restaurant aki y nos ta hopi agradecido cu nan a scoge un monumento pa pone nan restaurant. Tambe nos kier gradici tur esnan cu a participa den e exito di e proyecto aki,” el a agrega.

El a sigui splica cu ocho aña pasa SMFA a cumpra e edificio riba findishi pasobra e balor tabata hopi abao y nan tabatin miedo cu e por a cay den mas robes, den man di un hende cu por a destrui e monumento. Na prome instante nan no tabatin idea kico nan tabata bay haci cune, pero a cumpre pa salvaguarida e monumento.

Aworaki, despeus di e proceso di restauracion, por wak cu e tin hopi detaye original, a pone back den su forma original, a trece back e balcon y tur e detayenan cu e fundacion a haya durante restauracion a bin back den e diseño.

“Cu e finalisacion di e edificio di ex botica Aruba nos por garantisa como fundacion un biaha mas cu un otro edificio ta keda preserva pa futuro generacionnan. Danki na un y tur cu a yuda cu e proyecto aki,” Witsenburg a remarca.

Minister di Cultura y Finansas, Xiomara Maduro, tambe tabata presenta na e inauguracion aki y a enfatisa cu como minister di cultura, e ta “hopi contento” pa ta presente despues cu poco tempo atras e tabata presenta caba ora cu tabatin e renobacion di e casco, e parti pafo, di e edificio.

“Cada monumento cu wordo restaura den su gloria, e lo conta bo parti di su historia y e cas aki tambe tin su historia. Y hopi importante ta cu e ta haya hendenan nobo cu ta dun’e bida pa asina e por keda conta su historia,” el a subraya.

Maduro conta cu e edificio na Steenweg 19, a keda construi den añanan 20 pa sr. Addison Croes. Croes tabata un comerciante cu a construi varios edificio historico na Aruba y hunto cu sr. Gustave Nouel, nan a habri Botica Aruba, un di e prome boticanan na Aruba.

Botica Aruba a tene su portanan habri pa 50 aña. Despues Palais Hindu a cumpra e edifico y El Mercado a habri su portanan aki. Despues di esaki SMFA a mira e balor y importancia di e edificio y a cumpra esaki.

Maduro a enfatisa cu durante hopi aña e area di centro di ciudad tabata hopi popular pa comerciantenan y durante e ultimo tempo hopi comerciante a bandona e area. Pero aworaki cu e proyecto nobo aki, el a indica, ta bin un diferencia pasobra otro edificionan den area tambe ta cuminsa haya mantencion y ta cuminsa habri nan portanan back. “Algo cu sigur ta hopi alentador pa e area aki di nos ciudad y tambe pa economia di Aruba.”

Geoffrey Wever, Minister di Economia, Comunicacion y Desaroyo Sostenibel, a expresa cu como minister di economia e ta “contento di por a wordo invita pa ta presente awe pa wak dos empresario habriendo un restaurant den centro di ciudad.”

El a remarca cu ta un dobel celebracion pasobra di un banda ta restaura e patrimonio nacional, ta restaura e monumentonan y di otro banda ta desaroya e centro di ciudad, dun’e un otro tipo di ambiente y e parti di gastronomia lo yuda na esey.

“Mi kier a desea e propietarionan hopi exito y danki pa kere den Aruba, danki pa inverti den Aruba y danki pa comparti cu nos boso pasion y pa establece boso mes den centro di ciudad. Boso tin e opcion pa bay diferente luga, pero boso ta scoge pa inverti y tin boso empresa den centro di ciudad y nos ta contento pa mira esey,” el a indica.

Sr. Daphne Fernandes-Pedra, lider di proyecto pa SMFA, a splica e proceso di diseño cu a tuma luga y con nan a mantene algun elemento original y importante di e monumento den e di soño di e restaurant.

Fernandes-Pedra a conta cu ora cu e dos cabayeronan, propietarionan di e restaurant, a acerca SMFA pa huur e luga, ya nan mes tabata sa kico nan tabata kier y cu e tabata algo mas den e direccion di algo historico y no necesariamente moderno.

Durante añanan ora cambionan a tuma luga na e edificio, e fundacion tabatin suerte cu tabatin un elemento original cu e keda den e edificio, aunke no completo, pero scondi. E elemento aki tabata un plafond di plachi di bleki.

Fernandes-Pedra a splica cu e tipo di plafondnan aki, no hopi comun na Aruba, na bin na moda durante añanan 1880 na Merca y a keda popular te añanan 1930, ora cu produccion a stop pa motibo cu tabatin mester di metal pa e di dos guera mundial.

El a sigui conta cu durante e restauracion di e exterior di e edificio nan a descubri un variedad di diseñonan di e plachinan aki. A desmantela e plachinan y laga e contratista e tempo ey, warda esakinan y na momento cu a cuminsa cu e diseño di Koal Restaurant a mustra e propietarionan cu e documento ariba cual e proteccion di e monumento aki ta basa ta bisa cu mester trata di haci uso di esakinan back.

A base di e rekisitonan di e dos cabayero Fernandes-Pedra a cuminsa cu e diseño di e restaurant usando e plachinan di bleki aki pa accentua un di e dos elementonan mas importante di e restaurant.

A base di e inventario di e plachinan, e diseño a wordo crea. Como parti di e experiencia di e restaurant, e invitadonan ta pasa na e parti pafo ya cu parti di nan menu ta wordo traha riba nan grill, Miss Piggy, cu ta situa na e parti pafo y Fernandes Pedra a diseña un backdrop pa e grill usando e resto di plachinan y asina crea un espacio bunita parti pafo.

Por ultimo el a conta cu e ultimo deseo cu e propietarionan tabatin tabata pa usa tegel Arubiano di antes. Despues di hopi buscamento, a logra haya e tipo di tegelnan aki. Fernandes Pedra a usa e tegelnan aki pa crea un bunita collage di diferente tegel y como cu nan ta algo special, el a dicidi pa no pone nan riba vloer pero a diseña nan como parti di e restaurant pa resalta e parti unda e magia ta tuma luga, e cushina.