Monumento restaura di Piscadonan Perdi riba Lama oficialmente inaugura na Gouverneurs Baai

Siman pasa, na Gouverneurs Baai a tuma luga e ceremonia oficial di inauguracion di e monumento restaura di Piscadonan Perdi riba Lama. E acto a sirbi como un momento solem di recuerdo, respet y reflexion, dedica na honra e piscadonan cu a perde nan bida riba lama y cu nunca mas a regresa cas.

Durante e ceremonia, a resalta e importancia di memoria colectivo, solidaridad y reconocemento di e sacrificionan cu piscadonan a haci y cu ta forma parti integral di historia maritimo y social di Aruba.

Cu e restauracion di e monumento, Aruba ta reafirma su compromiso pa no lubida esnan cu a bay, ni e famianan cu nunca a haya e oportunidad pa despedi di nan ser keri. E monumento tambe ta sirbi como un recordatorio di e realidad duro cu piscadonan a/y ta enfrenta ora cu nan sali subi lama pa traha, sin e siguransa cu nan lo bolbe e dia ey pa pone pan riba mesa pa nan famia.

“Nan a sali bay traha y nunca a regresa,” ta un pensamento cu ta keda bibo den memoria colectivo di hopi bario, ta locual Prome Minister Mike Eman a expresa.

E profesion di piscado ta uno di hopi sacrificio. Poco profesion, tin famia cu mester biba cu e constante incertidumbre cu un ser keri por sali for di cas y nunca mas bolbe. Un sacrificio cu ta cana man den man cu e historia di Aruba, specialmente den temporada cu recurso di pais tabata limita y pesca, hunto cu plantacion, tabata esencial pa sobrevivencia.

Historia ta conta di periodo di gran secura, caminda piscadonan a bira un pilar di sosten pa famia y pa e pueblo, subi lama grandi pa provee alimento na momento di gran necesidad.

Cu honor y respet, Aruba ta recorda cada piscado cu a subi lama y no a bolbe mas. No lo lubida nan nunca. E monumento restaura ta rindi un homenahe digno na tur piscado cu nunca a haya e oportunidad di un despedida.

E renobacion di e Monumento di Piscadonan Perdi riba Lama ta representa un paso importante den preservacion di nos patrimonio historico y cultural, y na mes momento ta crea un espacio di consuelo, memoria y speransa pa famianan cu a keda atras. Graba riba e monumento ta e nombernan di esnan cu a perde nan bida riba lama, pa nan memoria keda preserva pa generacionnan presente y futuro.