Un hoben Chines a fayece algun dia despues cu el a wordo manda na un centro di tratamento pa adiccion riba internet, cual a inicia un serie di critica riba e tipo di institucionnan controversial manera esaki.
E hoben di 18 aña tabata tin algun heridanan grandi riba su curpa. E director di e centro hunto cu su staff a keda deteni. E incidente a tuma luga algun dia pasa parti oost di provencia Anhui, te aworaki e informacion a yega prensa internacional. Actualmente tin un crecemento grandi na China di “boot camps” cu e meta pa trata adiccion riba internet y online gaming. Algun ta conoci pa nan estilo militar di disciplina, anto a wordo critica pa nan practicanan cu ta demasiado brutal. Algun di e centronan aki ta opera bao di hospitalnan di gobierno, otronan ta priva of na scolnan.
Algun centronan di tratamento, manera esaki na Beijing, ta haci testnan EEG pa graba actividad electrico di e celebro di pashent
E hoben a desaroya un adiccion na internet y su mayornan no por a yud’e. Pues nan a dicidi di manda e hoben na un centro den ciudad di Fuyang cual a bisa di por uza un combinacion di consulta psicologico y training fisico pa trata muchanan cu tin adiccion riba internet. E hoben a yega e centro riba 3 di augustus, anto dos dia despues e mayornan a wordo informa cu su yiu a wordo transporta pa hospital cu urgencia, unda cu despues el a fayece. E motibo exacto tras di e morto di e hoben ainda no ta conoci.Pero e mayornan a wordo informa door di dokternan cu a mira e curpa di su yiu, cu el a sostene mas cu 20 heridanan externo, como tambe varios heridanan interno.
