Weekend ultimo, dia 27 di juni, a cumpli 10 aña desde e altercado cu polis na Hulanda, cu a resulta den morto di Arubiano, Mitch Henriquez. Dies aña despues, e efectonan di e caso aki ainda ta conmociona comunidad local.

Despues di un caso largo, na 2021, Corte Supremo a sostene sentencia suspendi di seis luna den prison pa un agente di polis acusa di abusa Mitch Henriquez, resultando den su morto na 2015. E polis a keda condena definitivamente pa morto di e Arubiano despues cu a usa un ‘chokehold’ riba dje durante su aresto na un festival di musica na Den Haag.

Henriquez a bishita un festival di musica na Den Haag na juni 2015. Mientras e tabata burachi, el a grita na un grupo di polis cu e tabatin un arma, puntando na su parti intimo. Henriquez a ignora advertencia pa hala atras, y a keda aresta pa desorden publico. Un total di cinco polis a deten’e. A usa e chokehold riba Henriquez, kende a bira malo y despues a fayece den hospital, segun e version oficial, maske testigonan na e sitio ta insisti cu el a fayece na e sitio mes.

Ministerio Publico di Hulanda (OM) a determina cu dos agente a usa forsa desproporcional riba Henriquez. Un di nan anteriormente a ser declara inocente den corte, y OM no a apela den su caso. E polis cu a keda condena definitivamente tabata esun cu a usa un chokehold riba Henriquez. E corte a determina cu uso di chokehold riba Henriquez tabata ilegal, mirando e riesgo di esaki, bisando cu loke a sucede “no tabata corecto” of tabata “incomprendible.” E hecho cu e oficial no tabatin intencion di mata Henriquez no ta cambia esey, Corte Supremo a declara.

A pesar di tur e conmocion, na momento cu Corte Supremo a sostene e sentencia, primo di Henriquez a keda sorprendi, pero contento cu veredicto di Corte Supremo, a bisa den su prome reaccion na Omroep West. “En realidad mi a pensa cu lo declar’e inocente”, el a bisa. “Esaki ta un final bunita.”

Papiando mediante un vocero, pareha di Henriquez, Ella de Groot a bisa e noticiero cu resto di e famia tambe ta contento cu e veredicto. “Mi ta contento cu no a decepciona nos atrobe. Nos a keda decepciona tanto biaha den e proceso aki.”

E famia no ta compronde pakico no a enhuicia e agentenan pa faya di busca ayudo pa Henriquez na momento cu el a bira malo, of pakico ta permiti pa nan sigui traha cu polis. Pero nan ta spera cu nan por cuminsa procesa e morto di Mitch berdaderamente awo cu e condena ta oficial. “Unico cos ta cu nos nunca ta bay haya Mitch back.”

Impacto di e caso
 E caso di Henriquez tabatin impacto enorme tanto na Aruba como na Hulanda.

Algo cu a hala atencion tabata e cantidad di placa cu Hulanda a gasta pa defende polis, mas di 1.3 miyon euro na abogadonan, segun RTL Nieuws a reporta basa riba cifranan ricibi di polis di Den Haag despues di un apelacion pa libertad di informacion. Esaki ta involucra solamente pago na abogadonan te cu mei 2018.

Bufete di abogado Sjocrona-Van Stigt a cobra 1,309,380.96 euro di polis entre juni 2015 y mei 2019, segun RTL Nieuws. Esaki a involucra asistencia legal na al menos 26 agente di polis – e cinco nombra sospechoso, y 21 polis testigo. Sjocrona-Van Stigt a bisa RTL Nieuws cu e factura enorme ta splica pa e tamaño di e caso di Henriquez y e cantidad grandi di agente di polis involucra.

Pero bogado y cientificonan a critica e suma cu polis a gasta pa asistencia legal den e caso aki, yamando esaki ‘extremadamente caro’, un ‘desgracia’ y ‘husticia clasista’ den respuesta na RTL Nieuws.

“E tarifanan extremo aki ta desproporcional na e tarifa cu e estado ta paga abogadonan cu ta asisti hende pober”, Mies Westerveld, emeritus profesor di Access to Justice, a bisa e noticiero. “E balans ta realmente perdi entre un abogado pa un agente di polis – kende ta sospecha di un crimen oficial – y e abogado di un civil kende ta sospecha por ehemplo di asesinato. Esey ta hopi malo pa estado di derecho.”

Richard Korver, kende a provee asistencia legal na mama di Henriquez, a ricibi alrededor di 50mil euro for di Conseho pa Asistencia Legal pa mita di 2018. Abogado Gerald Roethof, kende a asisti pareha di Henriquez, a ricibi 6,600 euro pa su esfuerso. “1.3 miyon ta un cantidad desgraciado di placa. Y gobierno a financia esaki. Otro sospechosonan no ta haya asina un presupuesto infinito pa contrata abogado y expertonan. Gobierno a crea un sorto di prome clase social pa su propio hendenan asina ora ta trata di ayudo legal. Mi ta kere cu esaki ta un desigualdad legal gigante”, Korver a bisa e noticiero.

Cinco aña despues di morto di Henriquez, mientras e proceso legal contra e agentenan involucra ainda tabata andando, e memoria di Henriquez tabata presente den acusacionnan di violencia di polis.

Durante e protestanan di Black Lives Matter na Hulanda na 2020, por a mira algun borchi cu nomber di Mitch Henriquez, treciendo atencion na su caso un biaha mas. Esaki pasobra ta mira e caso di Mitch como un caso di profilacion racial.

Jair Schalkwijk di e grupo Control Alt Delete ta mira similaridadnan entre e caso di Mitch Henriquez y esun di George Floyd na Merca, segun el a bisa e tempo aya. “Tur dos tabata homber color scur, sin arma y riba ningun manera tabata menasante pa polis y publico.” Lila ta comparti e mesun opinion. “Ta dificil pa prueba, pero mi ta kere cu Mitch su color y accent a pone e polisnan actua mas agresivo. Mi ta kere cu si tabata un Hulandes blanco e cos no lo a caba asina,” el a bisa prensa di Aruba e tempo aya.

Dies aña despues, casonan di brutalidad policial ta keda sacudi Aruba, cu e memoria di e caso di Henriquez ainda fresco. Esaki ta notable particularmente den e caso di e hoben Ayden Lanoy, di apenas 19 aña di edad, kende a muri despues di un persecucion policial.

E caso aki a pone luz un biaha mas riba e responsabilidad di agentenan di polis pa protege y preserva bida di tur ciudadano, generando protesta pa exigi husticia y exigi pa polis evita violencia contra e propio ciudadanonan cu nan mester protege.
E caso di Lanoy a trece cune exigencia pa agentenan usa bodycam. Pa esaki, siman pasa Cuerpo Policial a anuncia cu e proyecto piloto di bodycam a cuminsa.

Recientemente, minister di Husticia, Arthur Dowers a anuncia cu e investigacion forensico den e caso Lanoy a keda completa, y cu e investigacion di Landsrecherche awo lo continua.

Mientras tanto, e legado di e caso Henriquez ta visible den e reaccion den comunidad, cu ta exigi mas husticia, transparencia y responsabilidad di autoridadnan.