Movimiento Arubano Soberano(MAS)

Nos a drenta aña electoral 2017 y ya caba por mira algun partido preparando pa subi caya y campaña. Varios partido ta cla y a cuminsa caba mientras cu otronan ta den nan ultimo fase di preparacion. Nos a acerca e diferente partidonan cu ta bayendo eleccion y lo ta siguiendo nan pasonan durante e proceso electoral compartiendo cada desaroyo cu presenta. Segun e desaroyo di eleccion, nos lo bini cu entrevistanan bayendo mas profundo den e vision di cada partido. Den e manera aki abo como votado por keda informa y tin un bista mas amplio pa yuda bo cu bo decision di voto. Awe nos ta continua cu partido Movimiento Arubano Soberano (MAS).

MAS – E vision pa un Arubano soberano
E partido aki a wordo riba 17 di september 2015 y formalisa december aña pasa. Lider di partido MAS, Holmo Henriquez: “Nos vision ta pa un Arubano soberano. Den e sentido cu cada ciudadano mester ta independiente di e gobierno cu ta sinta, no ta importa cua e ta.”

E ta sigui bisa cu ta e gobernacionnan di pasado a contribui pa haci nos pueblo dependiente di e gobierno cu ta sinta. “Y ta p’esey awe no tin un oportunidad igual pa nos co ciudadanonan. Nos a lanta e partido aki pa pone e poder soberano bek den man di e pueblo.”
Sr. Henriquez ta haya cu ta e pueblo cu tin e poder den e pais cu ta determina ta ken of cua partido lo bay goberna. Pues pa e motibo aki e ta bisa cu mester cumpli cu e deseo di pueblo. “Aña aden y aña afo, eleccion ta bin y eleccion ta bay, anto bo ta haya e mesun dos sistema di partido cu a goberna. Nan a campaña un cos y goberna totalmente diferente. Semper pueblo a wordo gaña cu e tipo di gobernacion cu nan a campaña cu ne. Nos partido no ta bay haci promesanan falso pero mas cumpli cu nos palabra pa sirbi e miho interes di e pueblo Arubano.”

Creando lidernan pa Aruba
Partido MAS ta trahando riba yega na 29 candidato. Sr. Henriquez ta conta nos cu den nan structura nan tin espacio pa te hasta esnan cu ta studiantenan na universidad cu por subi un lista politico. Cu nan por forma parti di un lista politico pa gara e experiencia den politica.
“Nos partido ta structura di tal forma cu ta crea lidernan pa nos pais den futuro. No ta cuestion cu solamente un persona ta bira lider pa 30 aña of e mesun famia ta keda den poder. Nos a conoce e efecto di esaki pa 31 aña di status aparte.”
E ta sigui elabora: “Akinan nos tin cu crea lidernan pa nos pais y mester di bin cambionan den gobernacion pa cu nan maneho y no keda dependiente di un gobierno. Esaki ta pa siña nos pueblo pa e tin un opinion mas obhetivo en bes di uno manipula door di e partidonan tradicional cu a crece basa riba fanatismo.”

Preparando fuerte pa campaña
Sr. Henriquez ta bisa cu nan ta bay ta habriendo nan prome cas di partido na Playa hopi pronto y un otro na San Nicolas tambe. E ta splica nos cu nan lo tene pueblo pendiente di esey. “Ta bay tin actividadnan di cual lo ta informativo tambe pa e ora pueblo por conoce cada un di e candidatonan. Pa tambe dialoga cu nan riba e puntonan cu pueblo ta haya importante pa nos pone mas atencion riba dje. Y pa por trece e mehoracion pa e interes di e pueblo y no solamente tende algo y lubida riba dje despues.”

Confiansa di pueblo
Sr. Henriquez ta splica cu e ta haya cu nos partidonan tradicional na Aruba a haci un bon trabao den gana y kibra e confiansa di pueblo. “P’esey awendia bo ta haya cu hende no tin interes den drenta politica pa lucha pa nan pueblo y di dos bo ta haya cu e pueblo ta remarca cu tur partido of politico ta mesun cos. Ta nos politiconan mes a crea un mal nomber pa politica.”
E ta conclui cu politica no ta pa sirbi e politico pero mas bien pa sirbi e pueblo. “Door cu nan a crea e mal nomber pa politica, esey ta e desafio cu tur partido y politico nobo ta enfrenta. Pasobra bo tin cu bay gana e confiansa di pueblo bek. Un confiansa cu e partidonan existente a kibra pa decadanan caba. E manera cu nos tin cu haci e ta pa informa y ta sincero cu e pueblo. E sinceridad y honestidad di e politico mester refleha pasobra sino bo no ta gana confiansa di ningun hende.”

You May Also Like

POR a hiba un campaña informativo y educativo basa riba contenido

Lider di POR, Otmar Oduber a mira un clausura di campaña fructifero den cuadro ...

MEP – A cuminsa campaña masalmente caba

Nos a drenta aña electoral 2017 y ya caba por mira algun partido preparando ...

POR cu suficiente firma pa participa na eleccion

  POR a ricibi su 578 firma di sosten den poco mas cu 6 ...

Tur lista pa eleccion 2017 ta conoci

Durante henter dia di awe a tuma luga entregamento di lista di tur partido ...

Si tin 10 miyon disponibel, den unda lo inverti’e?

Tur siman nos ta publica e resultadonan di un poll riba un ponencia hunto ...

RED – Un partido pa progreso

Nos a drenta aña electoral 2017 y ya caba por mira algun partido preparando ...