(AP) – Menos di 6 luna atras, Mpox tabata un crisis di salud cu a explota. Loke tabata un malesa di Africa, a cuminsa afecta comunidadnan homosexual den Eruopa y Merca. Dosisnan di un vacuna tabata den tiki cantidad. Oficialnan internacional a declara emergencianan di salud.
Awe, reportahenan di casonan nobo a baha asina hopi cu e oficialnan di salud na Merca lo cera e mobilisacionnan di emergencia. E menasa aparentemente a disparce di e consciencia publico. “Nos ta den un luga sumamente diferente. E ta hopi impresionante con e punto halto cu nos a yega a baha te na nivelnan asina abao aki,” Dr. William Schaffner di Vanderbilt University a splica.
Algun ta elogia e oficialnan di salud publico. Otronan ta bisa cu tur esaki ta danki na e miembronan di e comunidadnan homosexual cu a tuma nan mesun pasonan pa reduci e plamamento di e malesa aki ora cu e menasa a bira cla. Algun ta puntra si e caracteristicanan di e malesa mes a hunga un rol.
Mpox, anteriormente conoci como Monkeypox, ta un malesa raro causa pa infeccion cu un virus cu ta den e mesun famia cu esun cu ta causa ‘smallpox’. E ta un endemia den partinan di Africa, unda personanan ta ser infecta pa medio di mordi di bestianan chikito, sinembargo no tabata conoci con facil e tabata plama entre hende.
