Awe, dia 3 di mei 2023, minister Geoffrey ta duna pabien na prensa. El a lubida caba cu diahuebs dia 23 di december 2021 e tabata menasa Johnny Habibe cu kita su radio. Ya Geoffrey no ta corda mas cu e tabata menasa Patrick y Speed cu introduccion di un mediaraad y un time delay system pa garantisa censura. Pakico?

Simplemente pasobra Hit94 y 24ora.com a honra e libertad di expresion di Michael Williams pa Michael duna comentario riba e detencion di su yiu. Realidad ta cu prome minister Evelyn Wever-Croes a uza plataforma di gobierno pa presenta su yiu como victima di e yiunan di Williams y pa haci politica contra Gerlien Croes. Pero e prome minister no tabata kier pa Michael Williams conta e otro banda di e medaya. Na final di dia Corte den Prome Instancia a dicta riba dia 21 di april 2023 cu Nigel y Chris Williams y Kevin Wever tur tabata culpabel di destruccion y violencia publico.

Awe minister Geoffrey Wever kier uza Dia Mundial di Libertad di Prensa pa mercadeo di su cartera Comunicacion y Desaroyo sostenibel. Awe e ta bisa yen di palabra bunita, manera: “Libertad di expresion ta un derecho humano fundamental.” Hasta e ta bisa cu “e dia aki ta pa recorda e gobiernonan rond mundo di e necesidad pa respeta nan compromiso cu libertad di prensa y e deber di e gobiernonan rond mundo pa proteha esunnan cu ta traha den prensa.” Un deber cu Gabinete Wever-Croes no a corda di proteha riba dia 22 di maart 2020 den caso di Sharina Henriquez di Caribisch Netwerk durante e pandemia di Covid19.

Libertad di expresion y libertad di prensa t’ey pa yuda personanan sin poder bisa e berdad sin cu nan mester tin miedo pa represaya. E ta basa riba e idea cu solamente e berdad por haci nos liber di berdad y cu solamente e berdad por crea un sociedad realmente husto y bon. P’esey cada ciudadano mester tin espacio pa yuda defini cua ta e problemanan mas importante pa soluciona. P’esey cada persona mester tin e derecho pa yuda crea un miho futuro pa nos tur. No ta existi democracia sin e derecho pa por participa den un debate nacional y sin e derecho pa por participa den decisionnan fundamental pa e comunidad.

E realidad ta tambe cu politiconan aki na Aruba kier bisa prensa ki pregunta pa haci, ken pa duna plataforma y ken pa silencia. E mentalidad ey ta dictatorial y antidemocratico. E ta pas den un cultura machista, pero e no mag di tin ningun luga den un estado di derecho.