Den ultimo dianan na Aruba a circula e noticia preocupante di un mucha menor di edad cu a crea imagennan indecente di maestra y muchanan di su scol cu uso di inteligencia artificial. Durante weekend, video y imagen a circula riba rednan social unda tabata menasa bida di e mucha en cuestion.

Medionan local a reporta siman pasa di e situacion preocupante na un scol MAVO di Aruba. Ta trata aki di un incidente den cual un mucha di 3de klas MAVO a haci uso di inteligencia artificial (AI) pa crea imagen y video pornografico di maestro y decenas di mucha muher di su scol. Esaki ta e di dos biaha cu e mucha aki ta haci e acto iresponsable aki.

E prome biaha el a hacie di su maestro. Pero segun informacion cu Bon Dia Aruba a ricibi, no a reporta e suceso na polis, sino cu e scol a tuma medida no specifico pa atende e situacion.
Sinembargo, pa di dos biaha a bin haya cu e mucha a bolbe hacie, e biaha aki trahando material indecente di decenas di mucha muhe di e scol.

E potret y video cu el a crea a circula entre hobennan di e scol, di cual un di nan a reporta loke ta pasando y asina e incidente a bira conoci. Loke ta particularmente grave den e caso, segun fuentenan cercano na e situacion a indica na redaccion di Bon Dia Aruba, ta cu ta te diabierna e scol a informa mayornan di e sucedido. Tambe ta critica e actuacion di e scol unda no ta considera cu a tuma suficiente accion na momento cu e studiante a haci e acto pa prome biaha, sino cu a lag’e te cu a bay pa di dos biaha.

Mirando cu e victimanan ta menor di edad, e caso a crea hopi conmocion. E muchanan afecta a sufri hopi ansiedad y presion riba nan salud mental.
Y empeorando e situacion mas ainda, por a nota cu tin imagen y post ta circula unda amigonan di e muchanan muhe involucra a cuminsa menasa e sospechoso di morto. Bon Dia Aruba a compronde cu e mucha lo ser expulsa for di scol, pero no tin garantia pa su seguridad mientras cu e ta enfrentando menasa di morto, cual tin posible vinculo cu gang di hoben na Aruba.

Mientras tanto, e incidente a causa reflexion tocante uso responsable di AI, y a genera yamado pa Aruba crea ley y reglanan estricto, duidelijk y comprensivo pa regula y controla uso di un tecnologia asina peligroso, particularmente entre hoben.