(AFP) – Un mundo chikito y poco conoci mas leu di Pluto ta parce di tin un atmosfera, astronomonan Hapones a bisa dialuna, desafiando loke anteriormente tabata considera imposible pa obhetonan di ijs den nos bario cosmico.
Si esaki ser confirma, e piedra di mas o menos 500 kilometer lo bira solamente e di dos mundo mas leu di Neptuno den nos Sistema Solar cu tin un atmosfera — despues di solamente Pluto mes.
Anteriormente clasifica como un planeta, Pluto su status a baha pa planeta enano na 2006, parcialmente pasobra astronomonan a descubri otro obhetonan similar den un region leu conoci como e ‘Kuiper Belt’.
Mientras NASA bao di presidente di Merca Donald Trump a propone idea di restitui status di planeta pa Pluto, e descubrimento di un otro atmosfera cerca por debilita e argumento pa su reinstalacion.
Pa e descubrimento nobo, investigadornan Hapones hunto cu un astronomo aficionado a apunta nan telescopnan riba un obheto cu un nomber complica: (612533) 2002 XV93.
E mundo di ijs aki ta casi 40 biaha mas leu di Solo cu Tera — of mas o menos 6 biyon kilometer di distancia.
E obhetonan scur aki por solamente ser mira ora nan pasa dilanti di un strea leu.
Ora esaki a pasa na januari 2024, astronomonan a observa cu luz di e strea no a bolbe inmediatamente, sugeriendo cu un atmosfera fini tabata filtra algun di e luz.
Nan ta calcula cu e mundo tin un atmosfera cu ta 5 pa 10 miyon biaha mas fini cu esun di Tera, segun un estudio nobo den Nature Astronomy.
“Esaki ta importante pasobra, te awor, Pluto tabata e unico obheto trans-Neptuniano cu un atmosfera confirma,” autor principal di estudio Ko Arimatsu di Observatorio Astronomico Nacional di Hapon a bisa AFP.
Mundonan chikito manera esaki no tabata considera capaz di mantene un atmosfera.
“E descubrimento aki, pues, ta desafia e punto di bista convencional cu mundonan di ijs chikito den e Sistema Solar exterior ta mayormente inactivo y sin cambio,” el a añadi.
