(AP) — E mundo ta na caminda pa agrega cerca di dos luna di dia peligrosamente super cayente tur aña prome cu fin di e siglo, cu nacionnan chikito mas pober golpia hopi mas frecuente cu e paisnan cu ta contamina mas cu carbon, un estudio lansa diabierna a haya.
Pero esfuersonan pa controla emision di gasnan cu ta atrapa calor cu a cuminsa 10 aña pasa cu e acuerdo climatico di Paris a tin un efecto significante. Sin nan, Tera lo tabata na caminda pa 114 dia mortalmente cayente adicional pa aña, e mesun estudio a haya.
E coleccion internacional di cientifico climatico World Weather Attribution y e Climate Central di Merca a uni pa usa simulacion di computer pa calcula exactamente cuanto diferencia e acuerdo historico a haci den termino di un di e efecto climatico mas grandi riba hende: ola di calor.
E rapport — cu ainda no a ser revisa door di coleganan pero ta usa tecnica estableci pa atribucion climatico — a calcula cuanto dia super cayente e mundo y mas cu 200 pais a haya na 2015, cuanto Tera ta ricibi awor y kico ta proyecta den dos scenario futuro.
Un scenario ta si paisnan ta cumpli cu nan promesa pa controla emision y pa aña 2100 e mundo ta keinta 2.6 Celsius mas halto cu tempo pre-industrial. Esaki ta agrega 57 dia super cayente na loke Tera ta ricibi awor, segun e estudio. E otro scenario ta e 4 Celsius di keintamento cu e mundo tabata na caminda pa alcansa prome di e acuerdo di Paris. E estudio a haya cu esey lo bira dobel e cifra di dia cayente adicional.
Dato di pais ta mustra desigualidad halto di calor
E 10 pais cu lo mira e aumentonan mas grandi den e dia di calor peligroso ta casi tur chikito y dependiente di e lama, incluyendo e Islanan Solomon, Samoa, Panama y Indonesia. Panama, por ehempel, por spera 149 dia super cayente adicional. Hunto e top 10 di e paisnan a produci solamente 1% di e gasnan cu ta atrapa calor awor den e aire pero lo ricibi cerca di 13% di e dianan super cayente adicional.
Pero e paisnan cu ta contamina mas cu carbon, Estados Unidos, China y India, ta predici pa ricibi solamente entre 23 y 30 dia super cayente adicional. Nan ta responsabel pa 42% di e dioxide di carbon den e aire, pero ta ricibi menos cu 1% di e dianan super cayente adicional.
Hawaii y Florida ta e estadonan di Merca cu lo mira e aumento mas grandi den dia super cayente prome cu fin di e siglo bao di e trayectoria actual di contaminacion di carbon, mientras Idaho lo mira e salto mas chikito, e rapport a haya.
Aunke e rapport ta haci sentido, Director di Instituto Climatico di Potsdam Johan Rockstrom, kende no tabata parti di e investigacion, a bisa cu hende no mester ser alivia cu nos ya no ta riba e trayectoria di keintamento di 4 grado pre-Paris pasobra e trayectoria actual “lo ainda a nifica un futuro desastroso pa biyones di humano riba Tera.”
