(AP) – Elon Musk a bisa cu Twitter lo retira e prohibicion riba e cuenta di ex president Donald Trump si su compra di e compania di red social keda finalisa, señalando con liber e plataforma por bira ora ta trata di libertad di expresion bao di e doño nobo.
Papiando virtualmente na un conferencia di auto, e CEO di Tesla a bisa diamars cu Twitter su prohibicion riba e cuenta di Trump despues di e incidente di dia 6 di januari tabata “moralmente un mal decision” y “extremadamente kinderachtig.”
“Mi ta kere cu e tabata un eror pa motibo cu el a separa un gran parti di e pais y ultimamente no a silencia Donald Trump,” Musk a bisa, agregando cu e ta prefera suspension temporal y otro tipo di castigo pa contenido cu ta ilegal of “destructivo pa e mundo.”
Co-fundador di Twitter y ex CEO Jack Dorsey a publica cu e ta di acuerdo cu esaki den un publicacion riba diamars bisando “generalmente, prohibicion permanente ta un fracaso di nos y no ta funciona.”
Musk den varios ocasion a critica Twitter su decision pa cu e moderacion di contenido, incluyendo e prohibicion riba Donald Trump su cuenta “pa causa di provoca violencia,” sinembargo el a evita di bisa kico e lo haci tocante un cuenta manera di Trump. “Si Musk ta concerni cu e cantidad di persona cu tabata disgusta cu Trump a keda prohibi di ta riba Twitter, e mester mira cuanto persona lo keda disgusta si e permiti su cuenta riba Twitter,” Kirsten Martin a expresa, ken ta profesor di etica di tecnologia na University of Notre Dame.
