(AP) – Elon Musk, e persona mas rico den mundo ta bisa cu e lo bende bienes di Tesla na un balor di 6 biyon dollar y duna e ganashi aki den donacion na e Nacionnan Uni su agencia di cuminda si nan por demostra con e placa lo yuda soluciona problema di hamber mundialmente.

Su declaracion a bini despues cu e director ehecutivo di U.N World Food PRogramme David Beasley a desafia Musk, fundador di amazon Jeff Bezos y otro biyonarionan den un entrevista di CNN siman pasa, haciendo yamada na nan persona pa “actua di un manera di directo” y yuda caba cu morto pa causa di hamber.

Den e entrevista, Beasley a bisa cu e biyonarionan por “duna 6 biyon dollar y yuda salba 42 miyon persona cu literalmente lo muri si nos no yega na nan.” “E no ta algo complica,” el a agrega.

E suma aki lo ta aproximadamente 2% di Musk su fortuna, cual ta di casi 300 biyon dollar segun Forbes. Su rikesa y e rikesa di varios Mericano multi biyonario a crece hopi lihe durante e pandemia di COVID-19 pa causa di e aumento den bolsa di balor y propiedadnan, hopi mas cu prome cu e pandemia.

E fundador di SpaceX a publica riba diadomingo riba e red social Twittr “Si WFP por describi bao di e publicacion aki exactamente con 6 biyon dollar lo resolve e problema di hamber mundial, mi lo bende bienes di Tesla aworaki y duna e suma aki den donacion.”

“Pero e mester ta hci cu contabilidad habri, nificando cu e publico por mira exactamente con e placa ta keda inverti y gasta,” el a agrega.

Den aña 2020, e agencia a ricibi 8.4 biyon den donacion, cual e ta isa ta 5.3 biyon menos di loke nan ta rekeri. E donacionnan mas grandi a bini di parti di Merca, Alemania y United Kingdom.

Beasley aresponde na Musk riba twitter contestando cu “6 biyon dollar no lo soluciona hamber mundial, pero e lo preveni instabilidad geopolitico, migracion den cantidad grandi y salba 42 miyon persona cu ta den punto di muri di hamber. Un crisis cu no a premira y un torment perfecto pa causa di Covid/Conflicto/Crisis di clima.”

E tambe a ofrece di reuni cu Musk y papia tocante e topico.

“Por fabor publica boso record di gastonan actual y proponi den detaye, pa hendenan por mira exactamente den kico y unda e placa ta bay,” Musk a bisa den un contesta di Twitter.

E no a keda cla riba dialuna si un reunion lo tuma luga.