Tabata alrededor di 11.19am ora cu Aruba henter a keda sin coriente. Di parti di N.V. ELMAR di biaha a mobilisa tur tecnico pa asina ta pendiente di e situacion. For di WEB Aruba N.V. a ricibi informacion cu ta debi na un explosion chikito den nan cashi di interconexion y lo a surgi un fayo cu a resulta den un black-out.
Alrededor di 12.45pm WEB Aruba N.V. por a cuminsa tuma load atrobe y N.V. ELMAR a cuminsa e proceso di suministra coriente. E prome barionan tabata Santa Cruz y Paradera. Pero alrededor di 2pm N.V. ELMAR, riba peticion di WEB, mester a desconecta algun cliente cu e consecuencia cu areanan cu a haya coriente, atrobe a experencia un interupcion.
Alrededor di 4.16pm, na momento cu N.V. ELMAR tabata falta 1 feeder pa suministra cu coriente a surgi un problema un biaha mas na WEB y WEB a tira diferente “feeders” di N.V. ELMAR afo pa asina por a stabilisa nan planta, resultando asina den interupcion di coriente den diferente barionan.
Durante henter e proceso aki N.V. ELMAR di su parti a keda monitor e stabilidad y suministro di coriente pa motibo cu e instabilidad na WEB Aruba N.V. ta afecta N.V. ELMAR su clientenan.
Pa 7.20pm N.V. ELMAR a suministra tur hende cu coriente back.
For di e momento di e black-out nos tecniconan tabata den comunicacion constante cu WEB. Tambe N.V. ELMAR di su parti a keda monitor spanning di suministro di coriente.
N.V. ELMAR ta expresa su disculpa na su clientenan pa cu e fayo den distribucion di coriente cu tabata fuera di nos alcance y ta gradici pa e pasenshi y comprension. Alabes N.V. ELMAR ta gradici su tecniconan y team completo di N.V. ELMAR cu a traha incansablemente for di oranan di mainta pa atende cu e black-out te ora cu e ultimo area afecta a wordo suministra bek cu coriente.
