Minister Gerlien Croes su controversial vuelo den jet priva pa Corsou ta un biaha den atencion publico. Segun declaracion di parlamentarionan di fraccion di MEP, despues cu nan a presenta na e Bezwaar Adviescommissie LAR ayera, ainda minister Croes no a entrega e documentacion cu nan a pidi tocante e biahe en cuestion. Segun e miembronan di fraccion di MEP, e dossier cu a ser presenta tabata “completamente bashi”, a pesar di varios promesa publico cu informacion lo ser entrega.

E topico cu a domina discusion politico na Aruba pa varios luna caba, ta draai rond di un biahe cu minister Gerlien Croes a haci na november 2025 den un jet priva rumbo pa Corsou. Oposicion a cuestiona na varios ocasion ken a paga e vuelo, si e areglo tabata conforme regulacionnan di integridad y pakico documentacion oficial ainda no a ser entrega a pesar di lunanan di preguntanan parlamentario.

Den su declaracion na medionan di prensa local despues di e reunion, lider di fraccion MEP Evelyn Wever-Croes a bisa cu e asunto a yega na e punto aki pa cu Parlamento a usa practicamente tur via disponibel pa haya informacion, pero no a logra. El a splica cu oposicion prome a purba di haya informacion via preguntanan parlamentario, pero e preguntanan ey nunca a ser contesta debidamente. Despues di esey, oposicion a inicia un procedura bao di Landsverordening Openbaarheid van Bestuur (LOB), e ley di transparencia publico di Aruba, pa pidi divulgacion oficial di documentacion relaciona cu e vuelo.

Pero e peticion ey tampoco a produci e informacion cu a ser pidi, loke a causa cu oposicion apela na Bezwaar Adviescommissie LAR. E caso lo ser trata formalmente otro siman diamars, pero representante di ambos banda a haya oportunidad un siman prome cu e caso ser trata pa inspecciona e dossiernan como preparacion pa e audiencia.

Parlamentario Wever-Croes a enfatisa cu nan a keda sorprendi ora cu nan a descubri cu e dossier, segun el a indica, no tabatin ningun prueba, aclaracion, comprobante di pago ni hustificacion presenta pa e minister. El a critica minister Croes pa crea impresion publico cu e lo presenta informacion pidi, mientras cu ningun documentacion no a ser entrega.

“E tabata den Parlamento ainda algun dia pasa y a bisa cu den e caso di LAR aki e ta bay trece tur informacion dilanti, pero lamentablemente a constata cu esaki no ta berdad,” Wever-Croes a indica.

El a argumenta tambe cu e controversia por a ser cera hopi tempo pasa caba si simplemente el a presenta comprobante di pago of documentacion oficial desde comienso. Na lugar di esey, segun e lider di fraccion di MEP, e falta di transparencia a haci cu e tema sigui domina debate politico y mantene tension den arena politico.

Despues di ayera, Wever-Croes a splica, nan ta bay prepara pa e caso cu ta bay tuma lugar otro siman diamars. Den e caso oposicion lo trece nan puntonan pa dilanti cu ta entre otro cu e minister ta nenga di duna informacion, ta viola palabracionnan, y cu, segun e parlamentario, ta burla e sistema, y no kier bin dilanti y bisa berdad

“Awe nos a bin cu e speransa cu nos por a pone un punto final tras di tur e cos aki pa asina nos tur por concentra riba e cosnan mas importante den nos pais, pero lamentablemente nos ta mira cu ainda nos no por pone un punto final, cu e minister ta scoge pa alarga e proceso aki,” el a subraya.

Parlamentario Rocco Tjon di su banda a describi e desaroyo como un gran desilusion. Segun Tjon, e asunto por a keda cla cu “pruebanan hopi simpel”, pero minister a scoge pa sigui prolonga e conflicto door di no entrega documentacion.

El a argumenta cu e procedura continuo ta costa recurso publico innecesariamente y ta consumi tempo di profesionalnan, mientras cu tambe ta afecta confiansa publico den institutonan politico. El a agrega cu e audiencia otro siman lo ta decisivo pa determina cual ta e siguiente paso legal y politico.

Parlamentario tambe a anuncia cu nan tin un reunion programa cu SE Gobernador di Aruba, Alfonso Boekhoudt pa trece dilanti e nan preocupacionnan serio y tambe pa presenta consehonan huridico cu e fraccion a ricibi relaciona cu e caso.

Segun Tjon, nan tin conseho huridico di expertonan di Merca y di expertonan local, dedica riba e parti di aviacion y dedica na tur regulacion cu tin di haber cu integridad. Ambos conseho e fraccion lo entrega na Gobernador.

Por ultimo, parlamentario Tjon a recorda pueblo cu minister Gerlien Croes no a biaha pa Corsou pa vakantie, pero el a biaha como un mandatario den funcion pa trabou y pa e motibo ey e tin e deber di presenta informacion y documentacion cu Parlamento pidi.

“E tin e deber tambe di contesta e mas di 100 pregunta cu nos a haci na dje, e tin e deber di bin Parlamento y acudi na e mas di 5 reunion publico cu nos a solicita, e tin e deber di bin Parlamento pa presencia e mas di 10 vragenuur cu nos a puntra y awe nos ta wak cu te hasta ora nos a haci uso di un derecho hancra den un ley, e LOB, minister Gerlien Croes ta opta pa laga e map completamente bashi,” el a finalisa.

E controversia di e biahe di jet priva a cuminsa na november 2025, ora minister Gerlien Croes a biaha pa Corsou den un jet priva prome cu un conferencia deportivo. Segun splicacionnan anterior duna pa e minister, originalmente e tabatin intencion di biaha cu un vuelo comercial e siguiente dia pa obligacionnan oficial di trabou. Sinembargo, despues el a ricibi un invitacion di autoridadnan di Corsou pa asisti na e celebracion di yegada di e seleccion nacional di futbol di Corsou despues di nan clasificacion pa Mundial. Pero pa motibo cu no tabatin asiento comercial disponibel pa e dia specifico ey, el a opta pa usa un avion priva.

Minister Croes a indica cu el a paga personalmente pa e vuelo cu su propio salario y a nenga cu tin algun iregularidad. Na diferente ocasion el a insisti cu e biahe tabata relaciona cu trabao y cu e critica cu e ta enfrenta ta principalmente politicamente motiva.

E asunto a bira ainda mas complica despues cu oposicion a cuestiona, den caso cu si efectivamente a haci un pago pa e vuelo, si operador di avion tabatin e autorisacion necesario pa conduci servicio comercial paga.

Representantenan di oposicion a splica cu vuelonan conduci a cambio di compensacion normalmente ta rekeri un Air Operator Certificate (AOC). Segun declaracionnan, e avion cu ta central den e controversia alegadamente no tabatin e certificacion ey, loke potencialmente ta crea preguntanan legal adicional dependiendo di con e areglo financiero a ser structura.

Fraccion di MEP ta argumenta cu e falta di documentacion oficial ta haci imposible pa verifica independientemente si e vuelo tabata un regalo, un areglo desconta of un pago legalmente conforme. Na mesun momento nan ta argumenta cu e rol constitucional di supervision di Parlamento ta ser obstaculisa door di e falta di divulgacion di documento y informacion.

E impacto politico di e asunto ta sigui crece mientras miembronan di oposicion ta mantene cu ministernan tin obligacion di coopera completamente cu supervision parlamentario, specialmente ora preguntanan ta relaciona cu posible conflicto di interes of standardnan di integridad publico. Di otro banda partidarionan di e minister ta argumenta cu e tema a bira excesivamente politisa y exagera pa ganashi politico.

A pesar di lunanan di debate, e pregunta central ainda ta keda sin respuesta definitivo: si e minister por presenta prueba concluyente mustrando exactamente con e vuelo den jet priva a ser organisa y paga.