Dia 3 di december ta conoci como Dia Internacional di Personanan cu Limitacion. En conexion cu esaki, Stichting Verstandelijk Gehandicapten Aruba (SVGA) ta preparando un actividad cu un gran significado social, educativo y humano. Jean Jarré Kock, Educador Fisico y Hefe di Departamento di Gymzaal di Deporte y Recreacion di SVGA a elabora riba e caminata cu lo sirbi no solamente como un recaudacion di fondo, pero tambe como un paso importante den promove inclusion, salud y conscientisacion den comunidad.

E caminata, cu lo tuma luga dia 29 di november, lo ta dedica na e Dia Internacional pa Personanan cu Limitacion. E meta di e caminata no ta solamente pa pa honra, apoya y stimula personanan cu limitacion na Aruba, pero tambe pa recauda fondo pa mehora e facilidadnan di gymzaal di SVGA y pa cumpra materialnan nobo cu ta usa cada aña den educacion fisico adapta.

Pa hopi di studiante y clientenan cu limitacion, e materialnan y e ambiente cu nan ta ricibi e educacion fisico den dje ta fundamental pa nan progreso motorico, cognitivo y social-emocional. Un gymzaal mas moderno y ekipa ta duna nan un oportunidad real pa sigui desaroya nan potencial den un manera seguro, profesional y accesibel.

Kock a splica cu e actividad di november ta marca e prome biaha cu un caminata asina inclusivo ta tuma lugar na nos isla na un escala asina grandi. Diferente instancia y fundacion lo bay traha man den man cu SVGA pa duna un muestra di unidad y aprecio pa e comunidad di personanan cu limitacion . E fundacionnan cu lo ta participa ta entre otro Brighter Future Academy, Sonrisa, Scol Inclusion, Ambiente Nobo y Ambiente Feliz. Esaki, Kock a enfatisa, ta un paso significante pa logra mayor participacion y visibilidad di personanan cu limitacion.

Den un mundo unda inclusion ta tuma un rol cada dia mas importante, Aruba no mester keda atras. E caminata aki ta un ehempel di oportunidad pa pone atencion riba e retonan cu personanan cu limitacion ta enfrenta dia pa dia, pero mas importante ainda, pa enfatisa e fortalesa, talento y perseverancia cu nan ta demostra constantemente. Haci deporte y participa den movemento fisico no ta solamente un actividad recreativo, sino un herment poderoso pa desaroyo personal.

Hopi participante ta depende di educacion fisico adapta pa sigui mehora nan stabilidad, coordinacion, forsa y capacidad di movemento. Pero deporte tambe ta un canal crucial pa crecemento cognitivo, pa stimula concentracion y pa reforsa conexionnan social. E caminata di Stichting Verstandelijk Gehandicapten Aruba ta ofrece tambe un plataforma na unda e personanan cu limitacion por sinti nan inclui, y sinti nan parti integral di comunidad.

Pa recauda fondo Stichting Verstandelijk Gehandicapten Aruba lo pone diferente caha di placa riba e ruta di e caminata, cu ta cuminsa panort di Alhamabra Casino sigui riba Eagle Beach Boardwalk y lo termina na Alhamabra Casino back, caminda tur persona por haci nan donacion.

Stichting Verstandelijk Gehandicapten Aruba: Un Pilar den Comunidad

Dentro di e structura di apoyo na personanan cu limitacion na Aruba, Stichting Verstandelijk Gehandicapten Aruba (SVGA) ta ocupa un rol central. Su mision ta enfoca riba cuido, guia y enseñansa pa personanan cu limitacion intelectual. Su meta ta pa e persona por desaroya den un ser independiente segun su propio capacidad. Esaki ta un meta noble, pero tambe un compromiso largo plaso cu ta rekeri recurso, dedicacion y esfuerso humano.

SVGA ta traha pa brinda enseñansa y cuido di calidad halto. E vison ta pa crea un bida di mihor calidad pa clientenan den un comunidad den unda dunador di cuido, profesional y famianan ta traha hunto pa bienestar di e persona cu limitacion. Actividadnan inclusivo manera e caminata ta completa e mision aki, duna mas espacio pa union, comprendemento y aceptacion.

Gymzaal SVGA ta un departamento cu por a logra cambio real y midibel den bida di esnan cu dependencia di educacion fisico adapta. Su mision ta yuda, stimula y mehora e cualidad di bida di su cliente y alumnonan door di deporte y educacion fisico. Un labor cu ta bay mas leu cu e simple hecho di trece movemento. E programa ta orienta pa fortifica condicion general, mientras cu ta traha simultaneamente riba desaroyo motorico, cognitivo y social-emocional.

Gymzaal SVGA tin un vision ambicioso pero realista: keda mehora continuamente. Aña tras di aña, innovacion den deporte adapta y educacion special ta trece innovacion y materialnan nobo cu por amplia e capacidad pa enseñansa y guia. E meta final ta pa crea den SVGA e mihor gymzaal na Aruba den tereno di acomodacion, deporte y educacion fisico adapta. Un espacio den unda cada persona cu limitacion por sinti su seguridad, su dignidad y su potencial.

E caminata inclusivo di Dia Internacional pa Personanan cu Limitacion no ta solamente un evento deportivo, pero ta un declaracion di respet y empatia. E ta un oportunidad pa mustra loke realmente ta importa: cuida otro, celebra diversidad y crea espacio pa tur hende, sin excepcion.

Pa esnan cu no tin un familiar cu limitacion, e caminata por amplia comprendemento y crea consciencia. Pa esnan cu ta biba cu limitacion of ta cuida un persona cu limitacion, e ta un momento di orguyo y union. Pa esnan cu ta traha dia pa dia den SVGA y instancianan participante, e ta un regalo y un recordatorio cu nan labor ta haci diferencia real.

Cu un simpel participacion, cada participante lo yuda recauda fondo pa cumpra materialnan nobo y pa contesta cu un SI fuerte na inclusion.

SVGA ta invita comunidad completo ta uni na e causa y participa dia 29 di november den e caminata pa celebra y duna un voto di apoyo na personanan cu limitacion.