Home Local Nacionalismo negativo contra Latinonan ‘ridiculo’ na Aruba

Nacionalismo negativo contra Latinonan ‘ridiculo’ na Aruba

474

Hopi hende cu ta xenofobo contra Venezolanonan por ehempel tin antepasadonan Venezolanonan, cual ta algo ridiculo pasobra ancestria Venezolano y Latino en general na Aruba ta sumamente comun.”

Asina curado di exposicion Poder y Ancestronan, esta Arturo Desimone ta conta Bon Dia riba un aspecto chikito di loke e exposicion colectivo ta trata.

E exhibicion na Gallery WM Amsterdam ta envolvi 14 artistanan internacional, tin como curadonan Sebastian Rypson y Arturo Desimone. E ultimo ta un artista naci y cria na Aruba.

Conhuntamente tur e artistanan riba nan propio manera ta explora e tema di conecta cu nan propio antepasadonan y e manera con artistanan contemporaneo por kibra e desinteres colectivo di conexion di antepasado mirando advent di tecnologia post moderno y emocionnan virtualmente fabrica.

Pa e curadonan di e exhibicion aki – cual segun sr. Desimone tin un conexion tambe cu Aruba – nan kier trece dilanti cu e artista ta un medio pa conecta pasado y futuro den un mundo unda ta comparti informacion riba un velocidad extremadamente halto , pero unda no tin memoria pa loke a pasa anteriormente.

Influencia antepasado
Esaki no ta toca solamente e contenido di e informacion si no tambe con e ta wordo presenta. Pues den hopi cultura occidental, incluyendo di nos, imagennan ta wordo comparti constantemente. “Tur hende ta fotografo y nos ta wordo bombardia cu imagennan diariamente.” Pero esaki no ta tur caminda asina. Segun sr. Desimone otro culturanan ta duna mas importancia na imagennan cu nos pasobra ey ta menos comun pa comparti asina hopi imagennan.

Consecuencianan pa nos sociedad – cual e exhibicion aki kier argumenta – ta cu imagennan ta bira hopi menos poderoso. E curado ta duna un ehempel di culturanan den medio oriente unda cierto imagennan por causa scandal, cual ta contrasta nos cu ta hopi menos vulnerabel, pasobra nos ta wordo bombardia regularmente cu nan.

Loke e exposicion colectivo ta trece dilanti ta cu tur e tecnologia aki ta solamente sirbi pa distancia nos di nos antepasadonan, pues e pregunta cu e artistanan ta purba haya un manera pa resolve ta: nos antepasadonan ainda ta nifica algo pa nos? Nan ta influencia nos bida ainda?


Pa e curadonan y e artistanan e rol di antepasadonan pa cada un di nos ta keda un influencia grandi den nos bida diario y nocturno por medio di guia, proteha y tormenta. E exposicion ta explora loke ta morto y e posibilidad cu nos tin pa tene interaccionnan profundo cu nan.

Explorando efecto di migracion
Pero kico tur esaki kiermen pa Aruba? Apart di ta un curado Arubano, sr. Desimone ta pone den cuestion e manera con Aruba ta trata asuntonan di migracion, unda claramente e por mira pa algun tempo caba – desde añanan 90- cu tin un sintimento nacionalista contra cierto migrantenan, cual ta inclui Latinonan.

Den e contexto di e obra e tema di migracion e artistanan ta nabega extensamente aunke esaki no ta e tema di e exhibicion. Artistanan manera Ron Amir (Hulanda/Israel) ta explora cu nan obranan, kico e rol di migracion a hunga pa e bidanan di su ancestronan, cual – danki na nan– e por ta bibo awendia.

Sr. Desimone mes ta participa cu par di obra den e exposicion, unda hunto cu Ron Amir e ta trece na luz e refugiadonan di holocaust cu a keda destrui riba islanan di Grecia manera Cyprus. Ambos artista tin antepasadonan hudiu nan no por a para di conecta cu esaki den e contexto di e exposicion.

Xenofobia contra Latinonan
Pero biniendo bek na Aruba, sr. Desimone, kende ta comparti hopi lasonan historico por medio di su antepasadonan cu paisnan manera Polonia, Colombia y Argentina, ta conta con ‘a mi semper a pensa cu biniendo di un luga chikito y multicultural manera Aruba tin su fruta, pasobra na un luga manera Aruba ta ridiculo pa hende ta nacionalista, aunke esaki sa pasa’.

Mirando cu Aruba a wordo colonisa, pero nunca a pasa un revolucion ‘berdadero’, esaki ta algo interesante pa mira pa sr. Desimone. E curado ta reacciona tambe riba e sintimento di xenofobia pa particularmente Latinonan y Venezolanonan. “Hopi hende cu ta xenofobo contra Venezolanonan por ehempel tin antepasadonan Venezolanonan, cual ta algo ridiculo pasobra ancestria Venezolano y Latino en general na Aruba ta sumamente comun. Mi mes tin aunke sea un conexion cu Colombia.”

Esaki ta algo cu a molestia sr. Desimone particularmente den añanan 90, unda tempo ey rond henter continente Latino Americano tabatin un ola di xenofobia na paisnan manera Argentina, Bolivia y mas pais cual ta ilogico, mirando cu ta paisnan cu a wordo construi pa inmigrantenan, segun sr. Desimone. “E tempo ey tabata particularmente straño pasobra bo ta haya persona cu ta corda nan experiencia cu discriminacion pero nan no ta stop di discrimina contra otro.”

Nacionalismo positivo y inclusivo
Pero aki sr. Desimone no ta contra tur forma di nacionalismo si no cu e ta critica fuertemente nacionalismo of etno-nacionalismo cu ta sirbi pa exclui y stigmatisa stranheronan, mientras por ehempel ta manda placa/capital na paisnan di afo.

E otro banda di nacionalismo – esta e nacionalismo cu ta inclusivo, kier desaroya propio industria, kier tin conexion cu propio tera of cu tin como meta pa bira mas independiente como pais/isla– ta loke e ta considera positivo, miho y mas creativo.

Na e exposicion no ta trata solamente cu temanan di migracion ‘nos lo amplia mas riba e exposicion aki den un proximo edicion y e temanan religioso y aristocratico cu e artistanan ta toca cu nan obranan’.

E exposicion Poder y Ancestronan lo ta presente na Gallery WM te fin di prome siman di april. Potretnan di obranan ta cortesia di curado Arturo Desimone.