E decision di gobierno di cuminsa cobra p ciudadanonan cu tin debe di impuesto prome cu nan ta bandona nos pais, a cay den mal tera y te hasta el a wordo mal interpreta of saca fei contexto.

Esaki minister di Financia, Angel Bermudez ta haya y e ta aclaria cu no ta trata di castiga niun hende. Sino cu den nos ley di impuesto semper tabatin un stipulacion riba e pago di impuesto prome cu bo ta bandona nos pais.

Minister Bermudez ta indica cu e specificacion aki ta bisa cu ora bo kier bandona e isla di Aruba permanentemente, kiermen ora cu bo kier inmigra for di nos isla, bo mester cumpli of libera tur cos entre otro for di departamento di impuesto. E specificacion aki ta vigente keto bay.

Segun e mandatario tin un forma di protocol entre Inmigracion y IASA cu ora cu nan ta descubri cu un persona kier bandona nos isla definitivamente lagando atras entre otro debenan di impuesto, e departamento di impuesto ta haya e señal ey.

Encuanto si tin hopi hende cu ta bandona nos isla definitivamente sin cumpli cu nan compromiso di belasting, e ta bisa cu esaki ta un ‘proceso dinamico’. Ya cu tur haya ta produci hendenan cu ta bandona nos isla y otronan cu ta bin bek. Logicamente e tin di haber cu e desaroyo economico y politico den nos region.

Ta asina cu un persona no por bandona nos isla te ora cu e por haya un declaracion di departamento di impuesto cu tur su asunto of compromiso di pago di impuesto ta regla. Pero esey no ta conta pa esunnan cu ta biaha pa trabou of bay cu vakantie. Ya cu nan no ta bandona Aruba, si nan ta sali fei nos isla pero pa un tempo defini, nan ta bin bek.

Pa e tipo di persona of tipo di biahero ey e clausula no ta conta.”