Lider di mayoria Democrata den Camara di Representante, Nancy Pelosi a anuncia ayera tardi na miembronan di e Camara cu ta inicia un investigacion oficial cu por conduci na un ‘impeachment’ di presidente Donald Trump. Pelosi a haci e anuncio desde su oficina bisando cu “ningun hende ta riba ley.”
Cu esaki e lider Democrata cu pa basta tempo tabata evadi un contesta cla riba suplica di hopi di su coleganan pa tuma e paso aki, dunando asina aprobacion na e investigacionnan cu ta andando caba pa varios luna. Remarcable ta cu Pelosi a solamente anuncia e paso, pero no a involucra e Camara mediante un votacion. Tampoco a nombra un comision special encarga cu e investigacion, pero varios comision permanente lo continua cu nan investigacion riba nan tereno specifico. Pelosi a bisa tambe cu ‘mester pone e presidente responsable’.
Yamado pa un investigacion pa impeachment a intensifica despues di reporte cu Trump a busca ayudo di un otro gobierno den su esfuersonan pa reeleccion. Trump a pidi den un yamada telefonico presidente di Ucrania pa investiga un empresa unda yiu homber di Biden ta envolvi.
Presidente Trump no a tarda pa reacciona riba e anuncio di Pelosi. Trump a nota cu e anuncio di Pelosi ta bin net na momento cu e ta topa cu lidernan mundial na Nacionnan Uni. El a tweet cu ‘e Democratanan a proposito mester a ruina y desacredita esaki cu mas breaking news di sushedad di ‘Witch Hunt’. Asina malo pa nos Pais!’ Trump a anuncia cu e lo publica e transcripcion di e conversacion cu presidente di Ucrania.
