E narcotraficante Brasilero, Clauvino da Silva di 42 aña, conoci manera “Baixinho”, cu a purba di huy for di prizon door di disfrasa su mes manera su yiu muhe, a wordo haya morto den su cel diamars mainta, segun informacion duna door di e instituto di coreccion.
E caso aki a tuma luga den e prizon di Bangu 1 na Rio de Janeiro, cual ta un prizon di siguridad maximo. “El a colga su mes cu un laken”, un oficial di e prizon a duna di conoce.
Clauvino da Silva a bira masha popular e ultimo dianan aki pa motibo di video y potret cu a circula riba rednan social, unda por a wak con di forma creativo el a purba di scapa di prizon; un intento cu a ser frustra pa autoridad Brasilero.
E homber narcotraficante tabata sintando un castigo di 73 aña y tabata ser considera un di e miembronan mas importante di e grupo criminal “Comando Vermelho”.
