(CuraçaoChronicle) – Periodista investigativo, Nardy Cramm formalmente a apela su condena den e caso numera CUR2025H00032, bisando cu e veredicto den su contra ta viola e principionan di libertad di prensa y e derecho na un huicio husto.

E apelacion, entrega na Corte Comun di Husticia, ta delinea un serie di argumento legal y constitucional den su defensa, incluyendo supuesto fayonan procedural y prehuicio hudicial.

Anteriormente a condena Cramm di calumnia y difamacion pa un serie di articulo publica den Knipselkrant Curaçao, un plataforma di noticia digital di cual e ta fundador. E articulonan tabata critico di cierto figura publico y institucion na Corsou, loke a trece accion legal den su contra. Den e apelacion, Cramm ta argumenta cu su reportahe ta cay bao di alcance di deber periodistico den un sociedad democratico y mester ta protegi bao Articulo 10 di Convencion Europeo riba Derecho Humano, cu ta salvaguardia libertad di expresion.

E documento entrega na e corte ta resalta loke team legal di Cramm ta describi como “un persecucion criminal ilegal” y ta declara cu e proceduranan sigui den su huicio original no a cumpli cu e standardnan rekeri pa un audiencia imparcial. Specificamente e ta reta e obhetividad di hues Koenraad, kende a presidi riba e caso original y anteriormente a retira su mes di otro asuntonan involucrando Cramm pa motibo di duda riba imparcialidad.

Den su argumentonan complementario pa apelacion, Cramm tambe ta punta riba violacionnan di Constitucion di Reino Hulandes, argumentando cu prensa ta fungi como vigilante publico, sepcialmente ora di destapa acusacion di corupcion di gobierno y mal maneho financiero. E ta insisti cu condena di corte no solo ta castiga e personalmente, sino tambe ta pone un precedente peligroso pa periodismo independiente na Corsou.

 

Su defensa ademas ta critica e veredicto pa faya den considera adecuadamente e veracidad di su publicacionnan, di cual hopi tabata basa riba documento oficial, procedura legal anterior y registro publico. Segun Cramm, e fuentenan aki ta substancia su reportahe y ta demostra su intencion pa informa publico en bes di difama individuonan.

E caso a genera interes publico considerable, specialmente entre defensornan di libertad di expresion y independencia periodistico den Caribe. Ta spera un veredicto mas despues e aña aki.