Aruba ta experenciando mas y mas e efectonan di cambio di clima, cu aumento di temperatura, yobida intenso y repentino, ademas di secura persistente cu ta trece retonan pa comunidad y comercio, como tambe bienestar general y di nos medio ambiente.

Conseho Nacional di Resiliencia Climatico (NCRC) di Aruba a anuncia adelanto den su esfuersonan pa identifica y atende cu e impactonan di cambio di clima na Aruba. Pa yuda tur hende compronde miho e retonan aki, recientemente a lansa e “Climate Impact Atlas” di Aruba. E web portal nobo aki di clima ta duna informacion cla riba con cambio di clima ta afecta Aruba.

Actualmente NCRC ta finalisando un evaluacion amplio di riesgonan y efectonan di clima cu ta resalta claramente e menasanan cu Aruba ta enfrenta door di condicionnan di tempo extremo manera yobida fuerte, inundacion, secura y calor. Pero tambe e retonan continuo di aumento di nivel di lama y desgaste di nos costa ta señala. Olanan di calor ta birando mas frecuente y largo, cu impacto riba salud, specialmente pa comunidad vulnerabel, ademas di aumento den demanda di energia. Asina mes, ora tin yobida intenso, e awasero ta causa inundacion den areanan urbano y ta daña infrastructura, poniendo bida di hende na peliger. Di otro banda, Aruba ta enfrenta tambe periodonan prolonga di secura cu ta pone e recursonan di awa na peliger y ta afecta agricultura.

Mas aleu di un clima cu ta cambia, e riesgonan aki tin un impacto profundo riba nos medio ambiente y calidad di bida. E cambionan climatico aki ta subraya e necesidad urgente di strategianan di adaptacion pa proteha comunidad, infrastructura y medio ambiente di Aruba. A base di e evaluacion di e riesgonan y e impacto climatico, e concentracion ta riba e miho manera di forma responsabel y sostenibel pa Aruba prepara pa y adapta na diferente efecto di cambio climatico.

NCRC den colaboracion cu diferente partner ta organisando diferente actividad y tayer cu instancianan y expertonan pa intercambia di solucion y delinea strategianan apropia di adaptacion. Ademas lo organisa un encuesta pa tende directamente for di e comunidad tocante nan percepcion y experencia cu cambio di clima, y di ki manera por adapta. Esaki ta pasonan vital den desaroyo di un strategia di resiliencia climatico nacional pa Aruba. NCRC ta indica cu e meta ta pa avansa y fortalece e resiliencia di Aruba contra impacto di clima, sigurando un futuro sostenibel pa e generacionnan cu ta bini. Pa mas informacion tocante NCRC por bishita https://ncrc-aruba.org/cia.