(AFP) – Prome minister Israeli, Benjamin Netanyahu a bisa diabierna cu Israel ta bay keda den sur di Libanon ta ora cu Hezbollah desarma, tiki despues di e anuncio na Washington di un marco di acuerdo cu Merca y Libanon.
“Lo mas importante ta, prome cu tur cos, pa Israel keda den e zona di seguridad den sur di Libanon. Esaki ta un logro mayor, y nos ta bay manten’e tanten cu Hezbollah no desarma,” Netanyahu a bisa den un video pre-graba comparti cu medionan Israeli tiki despues cu a anuncia e marco di acuerdo trilateral.
E acuerdo – di cual no a anuncia detaye – ta resultado di cinco ronda di negociacion na Washington cu meta pa caba cu decadas di hostilidad y simannan di bataya entre Israel y Hezbollah den sur di Libanon.
E acuerdo “ta cuminsa pone na lugar un marco pa paz y seguridad duradero,” Secretario di Estado Mericano, Marco Rubio a bisa na e ceremonia di firma.
Den su declaracion riba video, Netanyahu a agrega cu ehercito Israeli tambe lo permiti ehercito Libanes pa tuma control di teritorio den dos area.
“Nos ta implementando dos area pilto, ambos riba recomendacion di ehercito. Un ta completamente pafo di e zona di seguridad y sur di Riu Litani, mientras e otro ta nort di Litani,” un riu den sur di Libanon.
Netanyahu a agrega cu no lo permiti pa civilnan Libanes desplasa for di e “zona di seguridad” cu forsanan Israeli a establece den sur Libanon bolbe nan cas.
“Nos ta manteniendo e zona di seguridad original na tur momento, fuera di e rango di candela anti-tanki. Nos no ta permitiendo Hezbollah drent’e, ni nos ta permiti e poblacion civil pa drenta,” Netanyahu a bisa.
Hezbollah a hinca Libanon den e guera mas amplio den Medio Oriente dia 2 di maart cu raket contra Israel como vengansa di asesinato di Lider Supremo Irani, Ayatollah Ali Khamenei den atakenan Mericano-Israeli.
Despues Israel a lansa atakenan aereo y un invasion cu Libanon ta bisa a mata mas di 4.200 persona.
Bao presion di Merca, oficialnan Libanes a cuminsa negociacion directo cu Israel na april na Washington, y a anuncia un tregua dia 17 di april cu finalmente no a logra stop e combate.
E luna aki a declara un acuerdo nobo pa stop combate, cu Teheran insistiendo cu su deal cu Washington pa termina cu e conflicto mas amplio inicia pa Merca y Israel fin di februari mester inclui Libanon.
