(AP) — Prome minister Israeli, Benjamin Netanyahu ta bisa cu “no tin manera” cu Israel lo stop su guera na Gaza hasta si yega na un acuerdo pa libera mas rehen.
Comentarionan di Netanyahu probablemente lo complica negociacionnan riba un acuerdo nobo di alto al fuego cu a parce di gana momentum despues cu Hamas a libera e ultimo rehen Mericano na bida dialuna, den un gesto pa presidente Donald Trump, kende ta bishitando e region sin bay Israel.
Nan ta punta riba un posible empeoramento di e tension entre Netanyahu y Trump, cu a expresa speransa cu e liberacion di soldad Israeli-Mericano, Edan Alexander lo ta un stap pa caba cu e guera di 19 luna.
Den comentarionan publica pa oficina di Netanyahu diamars, di un bishita na soldadnan herida e dia anterior, e prome minister a bisa cu forsanan Israeli ta apenas algun dia leu di un escalacion di forsa y lo drenta Gaza “cu gran forsa pa completa e mision… E ta nifica destrui Hamas.”
Cualkier acuerdo di alto al fuego lo ta temporal, segun e prome minister. Si Hamas bisa cu nan lo libera mas rehen, “nos lo acepta nan, djey nos lo drenta. Pero no tin manera cu nos lo stop e guera,” Netanyahu a bisa. “Nos por haci un alto al fuego pa un cierto periodo di tempo, pero nos ta bayendo te final.”
Hamas a bisa cu lo libera e resto di e rehennan solamente a cambio di mas prisonero Palestino, un alto al fuego duradero, y retiro di Israel for di Gaza. E disputa riba fin di e conflicto ta e obstaculo principal den negociacionnan cu tin mas cu un aña andando.
Israel a priminti di intensifica su ofensiva, incluyendo door di invadi Gaza y desplasa hopi di e poblacion di e teritorio atrobe. Israel ta bisa cu e stapnan ta destina pa presiona Hamas pa acepta un acuerdo di alto al fuego cu terminonan di Israel. Netanyahu ta bisa cu e ta comprometi pa trece back tur rehen, destrui Hamas, y desplasa mayoria di e poblacion di Gaza a traves di loke e ta describi como “emigracion boluntario.”
Netanyahu a expresa sosten pa un plan proponi pa Trump pa move Palestinonan for di Gaza despues di e guera – un propuesta cu a genera rabia entre Palestinonan y nacionnan Arabe.
“Nos a hinca den otro un administracion cu lo permiti nan sali, pero e problema cu nos ta un cos – nos mester paisnan receptivo,” Netanyahu a bisa durante su bishita na e soldadnan herida dialuna. “Esey ta riba loke nos ta trahando awo. Si bo duna nan aprobacion, mi ta bisa boso cu mas di 50% lo bay, y mi ta kere hopi mas.”
Israel y Merca ta buscando paisnan dispuesto pa tuma Palestinonan cu potencialmente lo bandona e teritorio.
