Netflix a caba di publica su resultado financiero pa di dos trimester di 2019. Den un carta dirigi na nan inversionistanan, Reed Hastings, CEO di Netflix, a confirma cu durante e di tres trimester di 2019 lo lansa un plan nobo di miembresia cu lo permiti consumi contenido for di un telefon smart of un tablet.

Esaki no ta prome biaha cu ta tende di e plan ‘mobile’ aki pa Netflix. Na november 2018 e compania a cuminsa un serie di prueba na Malasia y otro paisnan emergente cu a sirbi pa tuma e decision awo di lansa esaki di manera oficial, aunke inicialmente no lo ta conta pa henter mundo.

Segun Netflix, e plan nobo aki ta permiti miembronan pa wak contenido solamente for di un aparato mobil, sea ta un telefon celular smart of un tablet. E calidad di transmision lo ta mas abou cu un resolucion di 480p y su atractivo lo ta e prijs, ya cu lo ta mas barata cu e plan inicial riba e aplicacion.

Te cu aworaki, Netflix no a confirma e prijs di e plan nobo aki, pero ta kere cu e lo por ta mita di e plan basico, kier men un 4 dollar.

E lansamento di e plan aki lo cuminsa na India, ya cu e idea ta pa capta un cantidad mas grandi di miembronan nobo den un region caminda e ARPU (entrada promedio pa usuario) di e TV pago, ta bou di 5 dollar, ya cu esaki lo impulsa e consumo di contenido di gasto abou.

Netflix no ta descarta cu den futuro lo lansa e plan aki na otro paisnan, aunke esey lo depende di nan prueba y analisisnan post e lansamento na India.

Pa aworaki no a duna di conoce mas detaye riba e plan aki. Por ehempel, no ta conoci si lo por uza metodonan di transmision manera AirPlay of Chromecast pa wak e contenido na un television, of si lo por wak for di un laptop.

Importante lo ta pa conoce e reaccion di publico, ya cu Netflix ta sigur cu na India tin mercado pa e tipo di miembresia aki, pero lo mester wak kico ta pasa na resto di mundo. Sin duda un strategia interesante, mas ainda awor cu ta bin un serie di servicionan nobo di streaming.

 

LEAVE A REPLY

Please enter your comment!
Please enter your name here