(AFP) – New York ta prohibi studiante di usa inteligencia artificial (AI) te nan yega scol secundario, alcalde di ciudad a anuncia diaranson, como parti di un medida cu tin como meta proteha educacion y salud mental di muchanan.
E restriccion di un aña lo afecta casi 600.000 alumno di scol publico te cu scol secundario y probablemente lo ser sigui cu hopi atencion den resto di Merca, pasobra e sistema escolar di New York ta esun mas grandi di e pais.
Solamente studiante di scol secundario, generalmente di 14 aña of mas, lo por usa AI den programanan piloto limita.
Nan tambe lo ricibi dos les pa aña tocante alfabetisacion di AI, pa siña con e tecnologia ta funciona y con pa us’e di manera responsabel.
Chatbotnan di compañia, diseña specificamente pa ofrece apoyo emocional, lo ser prohibi den tur nivel escolar.
“Industria tecnologico kier haci nos kere cu educacion tempran basa riba AI no solamente ta inevitabel, sino necesario. Nos no ta mira esaki asina,” alcalde Zohran Mamdani a bisa den un declaracion.
“Muchanan tin mester di maestro y conexion humano pa siña y crece. Nan mester desaroya habilidadnan hunto cu nan compañeronan, construi relacion cu educadornan y purba resolve problemanan dificil pa nan mes,” el a agrega.
Maestro si por sigui usa AI
Maestronan lo sigui haya permiso pa usa AI pa plania les y ehecuta tareanan administrativo.
Durante aña escolar 2026-2027, un grupo di trabao cu ta inclui studiante, maestro, mayor, funcionario eligi y experto di industria lo reuni pa evalua impacto di e moratorio.
Despues di e periodo ey, e grupo lo publica su resultadonan.
“Nos tin responsabilidad pa sigura cu tecnologia cu ta cambia rapidamente ta apoya nos muchanan y nan educacion, en bes di bira un obstaculo pa nan,” gobernador di New York Kathy Hochul a bisa diaranson.
Reglanan nobo ta sigui critica di mayor y maestro
E reglanan nobo ta sigui despues di un marco inicial publica na maart, cu tabata permiti studiante usa AI pa investigacion, exploracion y proyectonan creativo.
E propuesta ey a provoca critica fuerte entre hopi mayor y maestro, cu tabata considera e reglanan demasiado flexibel.
Como contesta, canciyer di scolnan di e ciudad, Kamar Samuels, a reconoce cu e lidernan “no a logra comunica e politica di e manera corecto”.
El a agrega cu su oficina lo revisa e comentarionan y preocupacionnan pa incorpora nan den reglanan futuro.
