(infobae) – Doño di frankisia Miss Universo, e Thailandes, Anne Jakrajutatip a informa ayera cu e famia di e actual Miss Universo, e Nicaraguense Sheynnis Palacios a sali for di Nicaragua, y cu Palacios a keda den exilio “indefinidamente” for di su pais.
Den un publicacion riba rednan social relaciona cu Dia di Mama, Jakrajutatip ta elogia e ex-director di e organisacion na Nicaragua, Karen Celebertti, kende a keda expulsa pa e regimen di Daniel Ortega y acusa di delitonan di conspiracion y traicion di e patria. “A exilia henter su famia, incluyendo nos Reina pafo di e pais indefinidamente debi na e poder di e marca Miss Universo!” Jakrajutatip a expresa riba Instagram.
E doño di Miss Universo tambe a papia di e cualidadnan humano di Palacios y a destaca su forsa y dedicacion “pa cuida di bo mama y di henter e famia awo cu ta fuera di e patria.”
Diario La Prensa di Nicaragua a recoge e afirmacionnan aki, y a cita cu dianan prome a papia riba rednan social cu e wela y ruman homber di Palacios, kende ta biba na New York pa atende su responsabilidadnan como reina di beyesa, a sali for di e pais Centro Americano pa reuni cu Palacios “a traves di parole humanitario”, un via migratorio habri pa Merca.
Sheynnis Palacios ta e prome Nicaraguense y Centro Americano pa gana Miss Universo, cual su edicion di 2023 a celebra dia 18 di november na El Salvador. E reina di beyesa, di 23 aña di edad y kende no a bolbe Nicaragua, a bishita den ultimo lunanan Costa Rica y Merca, unda e diaspora Nicaraguense ta importante.
Regimen di Ortega dia 26 di april ultimo a lansa su propio certamen di beyesa despues di acusa e representacion di Miss Universo na e pais di delitonan di conspiracion y traicion di e patria y di destera su ex-directora.
