Den un articulo publica riba website di Ministerio di Relacion Exterior Venezolano, presidente Nicolas Maduro a indica cu “solamente den paz y cooperacion tin desaroyo mutuo, como tambe crecemento conhunto cu islanan di Aruba y Bonaire.”
Maduro a laga su posicion cla na momento di comparti e dato cu turismo di Venezolanonan pa Corsou a aumenta 362% despues di reapertura di frontera.
E presidente a indica cu e caminda di Venezuela, Aruba, Corsou y Bonaire, “cu ta akinan dilanti di otro y ta region- y pueblonan ruman,” ta pa brasa otro den e ideal di Bolivar y di union Caribeño y Latino Americano y cu “nunca mas nan pone nos bringa otro.”
E mandatario Venezolano a insisti cu “solamente den paz y cooperacion tin e desaroyo mutuo di Aruba, Corsou, Bonaire y Venezuela,” den su programa Con Maduro+.
Maduro a cualifica como “increible” e aumento di 362% di turismo Venezolano na Corsou, ya cu el a sucede “apenas algun luna atras y for di Venezuela na islanan Aruba, Corsou y Bonaire, mi ta manda un saludo.”
E hefe di estado a exalta e comercio cu ta registra for di costanan di Falcon y Carabobo, for di eynan ta mandando “productonan di calidad halto, y con hopi hende di Aruba, Corsou y Bonaire ta gusta productonan agricola Venezolano.”
“Bacoba, pineappel, awacati, koffie, ta bringa pa nan na e islanan aki (…) pero tambe turismo a reanuda, cantidad di Venezolano cu ta bayendo di turismo.”
Esaki despues cu segun e comunicado di gobierno Venezolano, oficina di turismo di Corsou a revela cu entre januari y september di 2023, e fluho di Venezolano cu a bishita Corsou a experimenta un crecemento exponencial. Despues di reapertura di frontera y reactivacion di intercambio aereo entre ambos pais, un total di 3,358 Venezolano a biaha na e isla Caribense, representando e aumento di 362% compara cu e mesun periodo di e aña anterior.
