Nicole Natalie Lin ta un persona cu na 2016 a haya un pulmonia. Na e momentonan ey, su dokter a bisa cu el a haci tur loke por haci p’e, pero cu e mester bay cas pa regla tur su asuntonan, pa motibo cu segun e dokter, e tabatin un expectativa di bida di cuatro pa seis luna.

Lin a trece dilanti cu, segun dokternan mes a bisa, e tabata pashent pa transplante di pulmon, pero su problema ta cu e ta padece di varios enfermedad auto-immuun manera artritis, lupus, malesa cronico y tambe tabata pashent di cancer. Pa e motibo aki e no ta den remarca pa haci e transplante.

For di e momento ey, el a cuminsa lesa riba internet tocante e malesa cu e tin Chronic Obstructive Pulmonary Disease (COPD), termino general pa describi entre 14 pa 15 malesa di pulmon progresivo, y el a descubri un tratamento na Merca ,cu na e momentonan aki ta den e top 10 di e casonan mas exitoso di e tratamento di stem cell, aunke e tin cu cana cu oxigeno portatil.

Despues cu el a haya su prome tratamento, el a expresa cu el a cuminsa wak e cambionan gradualmente den su bida. Den seis siman tabata papia mas lihe, cana pa bay baño, cosnan simpel cu e no por haci lunanan atras.

Esaki ta trata di bay un clinica na Merca cada seis luna pa Nicole por extende su bida y su pulmon por keda stabiel. “E ta un lucha pa mi, pasobra cada seis luna mi mester di 21.000 florin”, el a declara.

Na e momentonan aki, Lin a informa cu te ainda ta falta e cifra di 7.000 florin cu otro siman e mester haya pa por biaha pa Merca.

Lin a duna di conoce cu e tin un motibo pa yuda mas hende, pa motibo cu cada dia hende ta acerca na dje pa via di e mesun malesa, pero e hendenan ey ta na cas hopi malo y nan no por sali.

Pa e motibo aki, na luna di juli di e aña aki su tata Dr. Teodosio Lin, hunto cu Dr. John Croes y otro profesionalnan, a lanta e Fundacion Yuda mi pa Hala Rosea y nan ta purba kico por haci cu pashentnan cu tin malesa di pulmon y cu no ta interferi cu e tratamento cu dokter ta duna. Nan ta recauda fondo a traves di evento, concierto, entre otro.

“E fundacion a ser lanta pa profesionalisa e ayudo cu nos por haya”, el a declara, pa duna informacion pa pashentnan cu ta cronicamente enfermo y esunnan cu ta cuida di nan, organisa contacto entre pashentnan, haci bendemento pa cria fondo y material pa e pashent, asina como tambe stimula y financia educacion cientifico riba e tereno aki.

Nicole a splica cu loke e ta pidi ta pa e hende por compronde kico e ta pasa den dje, pa motibo cu no ta algo cu e ta cana pa pidi placa. “Mi kier biba, mi tin 47 aña y mi kier t’ey pa yuda mas hende y tambe pa nan por haya tratamento manera a mi ” el a manifesta.

Lin a declara cu e fundacion tin na e momentonan aki shete pashent, 482 pashent cu ta sufri di e malesa na Aruba cu ta registra, pero nan ta calcula cu por existi mas di 1.000 pashent cu ta cana rond sin sa cu nan ta sufri di e malesa. Lin a expresa cu tin hende cu ta bisa cu tin grip pa semper, pero no ta esey.

Pa finalisa, Lin a bisa cu e kier conscientisa comunidad y tambe kier hiba mas hende cu ta malo manera e mes afo. Door di e tratamento cu el a haya el a keda stabiel y tin un bon calidad di bida, su pulmon tin hopi mas forsa. Otro hendenan tambe tin cu ripara cu mester come mas saludabel, haci dieta y haci ehercicio.

“Bo tin cu yuda bo mes tambe pa e tratamento por resulta positivo y tambe tin un mente cu optimismo, tin cu move bay dilanti y tur dia saca forsa, mi no sa di unda pero bo tin cu sigui dilanti”, el a finalisa.

 

 

LEAVE A REPLY

Please enter your comment!
Please enter your name here