Organisacion Mundial di Salud (OMS)a bati alarma pa tur hende tene cuido cu e sangura Zika, ora cu bo ta bishita cierto paisnan di nos region.
E advertencia a wordo haci na esunnan cu ta regularmente ta biaha pa diferente destinacion di nos continente pa nan tene cuidao cu e sangura aki specialmente na Brasil, Colombia, El Salvador, Panamá, Bolivia, Ecuador, Guyana, Guatemala, Honduras, México, Paraguay, Surinam y Venezuela. Den nos region Caribe alarma a wordo bati na Barbados, Guadalupe, Haiti, Martinica, St. Maarten y Puerto Rico. E menasa di e sangura aki tambe a toca e porta di nos isla unda a wordo registra varios caso sospechoso di Zika.
Rep. Dominicana
Consul di Republica Dominicana na Aruba, sra. Joselyne Rosario de Rosa a declara na Bon Dia Aruba cu no ta existi niun temor pa bishita su pais. El elogia e trabou cu autoridadnan di salubridad publico ta bin realisando na Republica Dominicana pa controla e riesgo di e malesa aki transmiti pa e sangura Aedes aegypti. Esaki ta e mesun sangura cu ta transmiti Dengue y Chikunguya.
“Danki na Dios nos ta conta cu autoridadnan na nivel di salud cu a pone nan empeño pa evita cu e tipo di malesa of virus aki no plama den nos pais”, el a bisa.
E diplomatico a indica cu e autoridad di salubridad Dominicano ta trahando hopi duro. Tambe e gobierno central di Rep. Dominicana a facilita tur e recursonan necesario pa e transmision di e Zika, Dengue, etc… lo keda elimina y evita cu nan industria turistico ta wordo afecta.
Consul Rosario de Rosa a declara cu no mester existi niun temor pa bishita su pais. “E isla di Quisqueya ta liber di e virus aki pasobra nan ta realisa control sanitario cu ta duna nos garantia di esaki”, el a bisa na Bon Dia Aruba.
El a bisa cu e indice di e malesa aki a disminui y e ta kere cu den poco dia ya nan por bisa cu e tipo di malesa aki a wordo elimina fei di nan teritorio.
